PR husu Governu presiza investe maka’as hodi hasa’e produsaun rai-laran
DILI, 16 outubru 2024 (TATOLI) – Prezidente Repúblika (PR), José Ramos-Horta, husu ba Governu atu halo investimentu maka’as iha setór agrikultura hodi hasa’e produsaun rai-laran, hodi garante seguransa alimentar iha nasaun ne’e.
Xefe Estadu hato’o pozisaun ne’e iha Selebrasaun loron mundiál ai-han ne’ebé organiza husi feeding the future iha Palásiu Prezidensiál, ohin.
“Ha’u sempre ko’alia bei-beik, tau osan bo’ot liu ba agrikultura, maibé tau ho matenek, labele tau osan bo’ot, maibé sira ne’ebé kaer agrikultura la kaer didi’ak, produsaun la aumenta, diversidade laiha, ita tenke haree ona atu garante seguransa alimentár iha ita nia rain,” Horta tenik.
Tuir nia, Governu tenke haree polítika ne’ebé di’ak investimentu matenek no depozisaun di’ak liu tan atu bele aumenta produsaun.
“Bainhira Governu seriu hadi’a ona politika hodi aumenta produsaun rai-laran mak ita nia nasaun sei la enfrenta hamlaha, ita bele hamenus importasaun,” Horta dehan.
Horta fó komentáriu tan, nutrisaun hanesan xave ida husi ninia prezidénsia no estabelese ona Kantina Matak nu’udar inisiativa pesoál ida atu fornese ai-han ne’ebé ekilibradu, saudavel ba labarik sira iha komunidade sira ne’ebé hale’u, fó han atus ba atus kada loron.
“Agora daudaun ami habelar ba fatin sira seluk, inklui inisiativa ikus liu iha enklave Oe-Cusse, iha ne’ebé foin horseik loke dapur ida. Ba oin, parseiru sira hanesan Brazil food bele kontribui hodi halo dezafiu atu halakon má-nutrisaun iha Timor-Leste,” nia dehan.
Iha fatin hanesan, Jerente Vendas Brazil Food, Gaven Low hateten, selebra loron mundiál ba ai-han no promove hahan ekilibradu ba família sira ne’ebé saudavel, Brazil food organiza atividade ne’ebé foka ba komunidade iha Kantina Matak.
“Ita hala’o atividade ida iha kantina matak Palásiu Prezidensiál ne’e atu komemora loron mundiál ba ai-han no promove hahan ekilibradu ba familia sira sai saudavel,” Gaven hateten.
Nia dehan, Brazil food hanesan empreza ai-han ida ne’ebé bo’ot liu iha mundu, durante tinan 15-resin exporta nia produtu manu tolun, Sadia, Perdigao, Perdix no Borella husi Brazíl mai Timor-Leste.
Selebra loron mundiál ai-han tinan 2024, Brazil food halo parseria ho xefe koziña Timoroan oi-oin no parte sira iha setór nutrisaun nian ba atividade edukasionál sira iha eventu komunitáriu ida iha Kantina Matak iha Palásiu Prezidensiál Nicolau Lobato Dili.
Nia reforsa, útiliza marka sira Brazil food nian, ekipa Kantina Matak ne’ebé hetan apoiu husi kompañia Timoroan MLO Kitchen, no PME ida ne’ebé lidera husi feto sira iha Dili, prepara hahan saudavel ida ba estudante sira no bainaka sira iha ligasaun ho demonstrasaun hahán interativu ida.
Jornalista: Hortencio Sanchez
Editór: Florencio Miranda Ximenes
