MAPPF rejista asu 54 pozitivu raibes iha zona fronteirisa
DILI, 18 outubru 2024 (TATOLI) – Diretora Veterinária Ministériu Agrikultura Pekuaria Pesca no Floresta (MAPPF) Joanita Jong, dehan moras rabies ne’ebé afetadu ba asu hamutuk 54 iha Covalima, Bobonaro no RAEOA.
“Ho númeru asu pozitivu moras rabies ne’ebé mak rejistu aas iha área Covalima, Bobonaro inklui RAEOA mak medisina veternaria husu ba públiku atu koopera ho ekipa imunizasaun ne’ebé la’o iha territóriu laran atu fó imunizasaun ba asu sira ne’ebé mak komunidade sira hakiak atu bele evita ezisténsia moras rabies iha rai-laran”, Joanita Jong dehan iha Novo Turismuo, ohin.
Jong dehan, kazu moras rabies ne’ebé mak rejistu ona iha Medisina Veternaria hamutuk 54. Aleinde ne’e ekipa sira mós rejistu kazu pozitivu asu tata bibi iha Munisípiu Bobonaro no RAEOA.
“Agora ita rejista kazu asu pozitivu ne’e 54, infelizmente ita mós rejistu bibi rua ne’ebé mós asu pozitivu tata iha Oe-Cusse no ohin dadersan mak mate, asu pozitivu ida tata iha Postu Administrativu Maliana Munisípiu Bobonaro, bibi ne’e mate no sira halo teste iha ne’eba katak bibi ne’e pozitivu hotu”, nia deklara
Totál asu ne’ebé mak Diresaun Nasionál Veternaria hala’o hamutuk 22.682, husi númeru ne’e RAEOA iha 5.972 (73%), Covalima, 6.341 (71%,) Bobonaro hamutuk 10.369 (70% ) no Dili hamutuk 19.722.
Nia husu ba públiku atu koopera iha atividade imunizasasaun ba moras rabies tanba númeru kazu asu ho virus moras rabies aumenta ba bebeik.
Husu mós ba públiku tomak atu ho konsiénsia koopera ho MAPPF iha estabelsimentu atividade imunizasaun ba moras rabies nian, tanba kazu moras rabies aumenta bebeik iha área fronteira hanesan Oe-Cusse, Bobonaro no Covalima. Iha asu balun ne’ebé mak ekipa la konsege vasina, tanba asu nain sira mak lakohi autoriza, maske ami-nia funsionáriu sira hein atu fó imunizasaun, maibé nain mak lakohi duni atu fó imunizasaun, tanba ne’e mak kazu ne’e sa’e makas”, nia konklui.
Jornalista : Felicidade Ximenes
Editór : Zezito Silva
