DILI, 23 outubru 2024 (TATOLI) – Jestór SEARA, Engelbertus Babulu rekoñese, iha 2021-2022, SEARA halo falsifikasaun ba sasan sira ne’ebé mak liu prazu hodi kontinua faan ba públiku.
“Ami rekoñese katak sasan sira hanesan naan-manu, ikan no naan-aten liu prazu ne’e 2021 no 2022, maibé ami faan nafatin, entaun ami hatene katak ida-ne’e sala no sansaun saida mak husi Governu atu fó ami prontu atu koopera”, Engelbertus Babulu, dehan ba jornalista sira iha Loja SEARA Pantai Kelapa, ohin.
Babulu subliña, item produtu ne’ebé mak liu prazu mak naan-manu, ikan no naan-aten, ida-ne’e importa husi nasaun Brazil.
“Naan-manu no aten ne’ebé mak liu prazu ne’e iha kaixa lima, manu-kelen hamutuk kaixa neen, entaun sei halo destruisaun iha Tibar maibé ami sei halo karta ba munisípiu depois karta sai ona mak ami ba soe tanba agora daudaun ami koopera ho Governu atu taka ka oinsá ne’e depende ba Governu tanba ami mós mai servisu de’it”, nia afirma.
Ekipa AIFAESA kontinua halo inspesaun urjente ba loja SEARA iha Bidau, atu rekolla tan sasan sira ne’ebé mak liu prazu.
Iha fatin hanesan, Inspetora Autoridade Inspesaun no Fiskalizasaun Atividade Ekonómika Sanitária no Alimentár (AIFAESA ), akresenta inspensaun ne’e urjente ba produtu falsifikasaun iha Loja SEARA, Pantai Kelapa, insfrasaun sira ne’e bebeik mak tenke deside hodi taka loja.
“Loja sira ne’ebé mak halo infransaun bebeik, ami sei deside taka, nune’e sira bele aprende buat ruma tanba sira sente katak buat hotu selu, entaun sira garante katak osan iha selu de’it maibé ita taka provizóriu ida-ne’e problema ba sira tanba rendimentu laiha ona, entaun ida-ne’e laos hamate sira, maibé hanorin sira tanba sira-nia papel mak ema nia moris”, Odete revela.
Odete esplika, relatóriu ne’ebé ekipa foti sei submete ba parte jurídiku sir atu tetu ninia gravidade hodi bele aplika sansaun.
“Nain ba loja ne’e ema Malázia, la’os timoroan maibé realidade sira ne’ebé mak servisu iha ne’e mesak timoroan, entaun ita tenke servisu hamutuk nune’e ita-nia maluk sira labele hetan moras sira ne’e”, nia relata.
Jornalista : Felicidade Ximenes
Editór : Zezito Silva
