BAUCAU, 30 outubru 2024 (TATOLI) – Sekretariadu Tékniku Administrasaun Eleitorál (STAE) ofisiálmente lansa ona kartaun Biométriku iha munisípiu Baucau.
Diretór STAE Munisípiu Baucau, Natividade Freitas Guterres, esplika, liuhusi sistema Biométriku bele moderniza sistema atendimentu bainhira realiza eleisaun tanba bele fasilita verifika eleitór sira-ne’ebé iha sentru votasaun barak no menus partisipasaun inklui elimina eleitór sira-ne’ebé mate ona maibé parte autoridade suku seidauk submete lista ba STAE.
“Ami tuir ona formasaun iha nasionál, tanba ne’e ohin abertura kartaun Biométriku nian iha Baucau,” Diretór STAE Baucau hateten iha Vila Nova, kuarta ne’e.
Funsaun husi kartaun Biométriku referida mós bele minimiza dupla kartaun eleitorál hanesan eleitór balun tenta halo kartaun rua ho númeru kartaun diferente no iha munisípiu ne’ebé diferente.
Nune’e, ho sistem Biométriku bele antisipa situasaun sira-ne’e atu la akontese, tanba kartaun Biométriku utiliza sistema inter ligadu hanesan presiza dokumentu komplementár sira husi notariadu hanesan sertidaun nasimentu, Billete Identidade no Pasaporte.
“Foin lansa, tanba ligasaun ho liña internet entaun ita sei koko semana-ida atu hatene kada loron atende ema hira,” Natividade akresenta.
Kartaun Biométriku sei fasilita sidadaun sira atu utiliza hodi trata dokumentu hanesan konta bankária iha Banku, tanba bele utiliza kode.
Natividade husu eleitór sira hakbesik aan ba STAE atu trata kartaun eleitorál hosi semi Biométriku ba Biométriku bainhira loke ona atendimentu ba publiku.
Tuir planu, STAE Baucau sei halo atendimentu to’o baze liuhusi kada Postu Administrativu ho maneira tuir oráriu durante loron 10 hodi fasilita liu tan sidadaun sira, tanba tuir tarjetu mudansa kartaun sei finaliza durante tinan-rua husi 2025-2026.
Tuir dadus, totál eleitór ne’ebé rejista iha STAE Baucau besik rihun-100, no tuir tarjetu sei liuhosi númeru referida tanba seidauk envolve sidadaun ho idade 17 ne’ebé seidauk iha kartaun eleitorál anteriór.
Jornalista : Natalino Belo
Editór : Evaristo Soares Martins
