BAUCAU, 04 novembru 2024 (TATOLI) – Ró mout kauza husi korrente tasi rezulta peskadór inisiál FDF lakon vida iha área Kairavela, postu administrativu Vemasse, munisípiu Baucau.
Kazu ne’e akontese iha loron 03 novembru, oras 17:00, bainhira peskadór na’in-rua hala’o atividade peska iha tasi Kairavela no mosu laloran boot rezulta ró mout nune’e vítima FDF idade 20 lakon vida.
“Ita-nia ekipa kompostu husi Komandu PNTL hamutuk ho Bombeiru envolve iha ekipa salvasaun, dadeersan mak hetan entrega ona ba família,” Komandante PNTL Munisípiu Baucau, Superientendente António Maria de Sá hateten iha Vila nova, segunda ne’e.
Ekipa konjunta rasik depois rona informasaun kona-ba kazu referida direitamente to’o terrenu hodi buka tuir vítima no ohin dadeer hetan iha tasi-laran inklui halo evakuasaun no entrega ba família hodi haloot tuir kultura.
Komandu PNTL Baucau rejista kazu asidente trafégu rua kompostu iha suku Seiçal, postu administrativu Baucau Vila no Kairavela, postu Vemasse ne’ebé envolve entre motorizada ho motorizada, tanba halai ho velosidade másimu.
Kazu rua ne’e la rezulta ema ruma lakon vida maibé vítima sira hetan kanek kmaan no kontinua hetan tratamentu iha Ospitál Rejionál Eduardo Ximenes (HoREX, sigla portugés).
“Inísiu novembru, ita rejista asidente rua, hanesan iha Seiçal no iha Kairavela,” Superintendente Xefe de Sá akresenta.
Nune’e mós ema deskoñesidu iha suku Bucoli, postu administrativu Baucau Vila, iha loron-domingu, 03 novembru tenta tuda bís ho xapa-matríkula A.13-332 diresaun husi Dili-Baucau hodi rezulta janela parte liman karuk rahun inklui pasajeiru insiál NC tinan 31 hetan kanek iha parte ulun.
Jornalista : Natalino Belo
Editór : Evaristo Soares Martins
