BAUCAU, 06 novembru 2024 (TATOLI) – Autoridade Administrasaun Munisipál Baucau konvida komunidade no joven sira atu hamutuk kria pas no estabilidade iha Baucau.
Prezidente Autoridade Munisipál (PAM) Baucau, Veneranda Eurico Marques Lemos Martins, agradese ba kontribusaun komunidade hotu-hotu tanba situsaun jerál iha hakmatek, pas no dame durante selebrasaun loron finadu.
“Ha’u konvida ita-boot sira hotu atu hamutuk ho Autoridade Munisipál fó liman ba malu harii munisípiu ida iha-ne’ebé prevalese respeitu, pas no solidariedade ba malu,” Prezidente Autoridade Munisipál Baucau hateten iha Vila Nova, kuarta ne’e.
Autoridade Munisipál Baucau sente orgullu tebes ho komunidade tomak nia atetude, jestu hodi garante seguransa durante selebrasaun, nune’e ema hotu, família hotu-hotu, bele partisipa iha selebrasaun sira ho trankuilidade.
Eis deputada ne’e, argumenta, vontade ne’ebé komunidade munisípiu Baucau hatudu maka esensiál hodi asegura selebrasaun sira la’o la ho insidente, hodi permite ema hotu atu fó onra ba sira-nia matebiansira ho dignidade no respeitu.
“Entidade hotu hala’o ona papél fundamentál ida hodi promove dame no armónia durante períodu selebrasaun loron importante iha ita-nia munisipiu,” Veneranda Lemos akresenta.
Lemos hateten, unidade maka forsa ne’ebé maka’as ba dezenvolvimentu nune’e bainhira serbisu hamutuk, bele ultrapasa obstákulu sira-ne’ebé insuperável.
Nu’udar prezidente autoridade públika munisípiu nian, sempre nakloke ba sidadaun sira-nia sujestaun no preokupasaun tanba ho maneira hamutuk bele hetan dalan sira-ne’ebé efetivu atu rezolve kestaun koletiva sira.
Nune’e, liuhusi kolaborasaun no diálogu nakloke mak bele hetan solusaun inovadora sira ba problema iha sosiedade.
Autoridade Baucau konsidera, tradisaun kulturál no relijioza mak ai-riin fundamentál ba identidade nu’udar povu no nuda’ar mós sarani tanba momentu ida-ne’e maka bele reflete kona-ba moris, mate no kontinuidade memória koletiva sira-nian.
“Ita sei kontinua servisu hamutuk hodi promove ambiente ne’ebé seguru no akollidu iha ita nia munisípiu Baucau. Ita hotu nia hamutuk mak garante pas no estabilidade iha ita-nia munisípiu,” Lemos hakotu.
Jornalista : Natalino Belo
Editór : Evaristo Soares Martins
