DILI, 08 novembru 2024 (TATOLI) – Primeiru-Ministru, Kay Rala Xanana Gusmão, hateten, tinan 2025 Governu haree atu hadi’a kbi’it funsionamentu administrasaun públiku liuliu atu halo reforma ba funsionáriu públiku no haree mós ba saláriu funsionáriu sira nian ne’ebé durante ne’e la sufisiente.
“Ho Komisaun Funsaun Públika ami haree ona iha Konsellu Ministru nune’e, tinan oin atu hadi’a funsionamentu administrasaun públika. Tanba ita hotu sei la permite atu manán de’it osan la halo buat ida. Ida ne’e mak ita ho Komisaun Funsaun Públika ko’alia ona haree halo reforma obrigatoriu ba sira ne’ebé idade avansadu ona, nune’e ita sei haree mós ba funsionáriu públiku sira halo servisu ka la’e, ka kada tinan ita tau de’it muito bom mais pratika laiha, ne’e hotu ita sei hadi’a,” Xefe Governu hateten asuntu ne’e iha nia intervensaun durante loron ikus iha debate Orsamentu Jerál Estadu (OJE) 2025 iha faze jeneralidade ne’ebé hala’o iha Parlamentu Nasionál, sesta ne’e.
Iha 2025, Xefe Governu dehan Governu seriu atu rezolve problema ne’ebé akontese iha administrasaun públiku sira no la tolera funsionáriu hirak ne’ebé la servisu maibé kada fulan simu de’it osan.
“Ita sei haree hadi’a buat sira ne’e hotu, funsionáriu tenke servisu mak foin simu osan, maibé tu’ur de’it simu osan ne’e labele, ita tenke hadi’a mákina Estadu nian, Komisaun Funsaun Públika haree didi’ak, kuandu selu ema para halo servisu,” PM Xanana alerta.
Alende ne’e, Governu mós ko’alia ona ho Komisaun Funsaun Públiku atu haree ba saláriu ba Funsionariu Públiku sira ne’ebé durante tinan barak la sufisiente.
“Ami ko’alia ona ho Funsaun Públiku atu haree ba saláriu Funsionariu Públiku sira nian, ita haree médiku barak lakohi servisu iha Óspitál tanba osan menus liu, entaun sira hili ba servisu iha klinika privadu sira ne’ebé simu osan boot, funsionáriu hotu servisu kle’ur maibé sira nia osan nafatin uitoan, entaun Funsaun Públika haree hela hodi prepara proposta balu submete ba Konsellu Ministru sei lori to’o mai iha Parlamentu ne’e para ita haree hamutuk, tanba ita hakarak mákina Estadu funsiona ho di’ak aumenta mós sira nia osan, buat sira ne’e hotu ita rezolve iha tinan oin,” Xefe Governu ne’e afirma.
Rekorda fali katak, iha loron 08 fulan-fevereiru tinan 2022, Parlamentu Nasionál aprova Lei Foun Komisaun Funsaun Públika nian no Lei ida-ne’e atu hatán ba preokupasaun deputadu sira.
Molok ne’e mós Konsellu Ministrus aprova diploma ne’e, iha sorumutuk loron 28 fulan-jullu 2022, ho objetivu liu ona tinan sanulu hafoin harii Komisaun Funsaun Públika nian, ho lei ida-ne’e atu reforsa garantia sira independénsia atuasaun Komisaun ne’e nian no ninia komisáriu sira no iha tempu hanesan atu halo reforma ba ninia ámbitu intervensaun nian, liuliu atu rezolve dezafiu sira ne’ebé hasoru, no ne’ebé sai ona obstákulu ida ba efisiénsia funsionamentu Funsaun Públika nian.
Ho Lei foun ida-ne’e ho intensaun atu Komisaun Funsaun Públika iha papél apoiu nian ida hodi define polítika públika sira funsionalizmu públiku nian, nune’e mós atu reforsa kompeténsia sira Ministériu sira nian iha ninia implementasaun, tuir termu númeru 3 hosi artigu da-115 Konstituisaun Repúblika nian.
Lei foun ne’e mós ho objetivu atu klarifika podér sira intervensaun Komisaun Funsaun Públika nian, ne’ebé iha papél hodi garante promosaun ba legalidade, igualdade no independénsia funsaun públika nian.
Jornalista: Hortencio Sanchez
Editor: Florencio Miranda Ximenes
