DILI, 10 novembru 2024 (TATOLI)- Palásiu Prezidensiál liuhusi Xefe Kaza Sivil, Jesuína Maria Fereira Gomes, selebra akordu patrosíniu ida ho Empreza Viettel Timor, Unipessoal, Lda (Telemor) hodi apoiu realiza eventu Dili Maratona 2024.
Akordu kooperasaun ne’e, asina tanba Telemor apoiu osan ho montante $23.600 ba patrosíniu Maratona Dili 2024 no Timor Island Adventure 2024.
Akordu ne’e, formaliza husi Nguyen Viet Anh, Vise Diretór Jerál Telemor, no Jesuína Maria Ferreira Gomes, Xefe Kaza Sivíl Prezidénsia Repúblika.
“Iha parseria nia okos, Telemor sei fornese $19,600 iha apoiu finanseiru no $4,000 iha kartaun pré-pagu ba organizadór eventu sira,” tenik iha nota ne’ebé Agência TATOLI asesu hosi media Gabinete Palásiu Prezidensiál.
Pakote patrosíniu inklui vizibilidade marka nian ne’ebé komprensivu iha eventu rua ne’e, ho prezensa Telemor nian ne’ebé destaka iha materiál korrida nian hotu, ekipamentu atleta nian, no fatin eventu nian, hamutuk ho oportunidade partisipasaun ba membru pesoál Telemor na’in 30.
Dili Maratona, ne’ebé organiza hosi Prezidénsia Repúblika, hanesan eventu halai prinsipál ida iha nasaun ne’e ho kategoria no distánsia lubuk ida ne’ebé hatudu sidade kapitál nia tasi-ibun ne’ebé furak no marka istóriku sira.
Entretantu, Timor Island Adventure nian aprezenta dezafiu kruzamentu úniku ida ne’ebé destaka fatin oioin no beleza naturál nasaun nian iha illa Timor husi NTT, Indonezia no Timor-Leste laran.
Parseria ho Telemor hanesan testamentu ida ba kolaborasaun forte entre setór privadu no instituisaun nasionál sira, enkuantu Nguyen espresa Telemor nia kompromisu atu apoia eventu komunitáriu sira ne’ebé promove saúde no bem-estar iha Timor-Leste.
Jornalista: Hortencio Sanchez
Editor : Florencio Miranda Ximenes
