DILI, 11 novembru 2024 (TATOLI) – Partidu FRETILIN no Partidu Demokrátiku (PD) iha diskusaun Orsamentu Jerál Estadu (OJE) 2025, iha faze espesialidade atu implementa ona implementa desentralizasaun administrativa no podér lokál iha tinan 2025.
Deputada FRETILIN, Maria Angelica Rangel da Cruz husu ba Governu atu implementa desentralizasaun iha 2025 ho másimu no fó kompetensia ba funsionáriu sira iha Munisípiu atu halo servisu, nune’e servisu hotu labele konsentra nafatin iha nasionál.
“Ita hatene katak ba tinan 2025, Governu tau orsamentu ba Munisípiu sira ho montante ne’ebé mak boot, atu uniformiza ho enkuadramentu ne’ebé ko’alia kona-ba administrasaun sentrál, Rejiaun Administrativu Espesiál Oe-Cusse Ambeno (RAEOA), seguransa sosiál iha lei mós ko’alia kona-ba Munisípiu. Maibé ami haree Governu iha ona polítika atu halo desentralizasaun, maibé Governu nia polítika sei tau hamutuk iha administrasaun sentrál,” Deputada Rangel hateten iha Plenaria Parlamentu Nasionál bainhira debate Orsamentu Jerál Estadu (OJE) 2025 iha faze espesialidade, segunda ne’e.
Deputada ne’e dehan, Governu tenke fó kompetensia ba Munisípiu sira atu hala’o servisu tanba iha fatin balun iha de’it mak kargu maibé la halo buat ida tanba servisu hotu nafatin sentraliza iha nasionál.
“Tenke fó kompetensia ba Munisípiu sira, sela’e ita tuun ba Munisípiu sira dehan ami so iha kargu de’it, maibé servisu hotu iha nasionál, ezemplu iha Viqueque sira dehan, ami iha ne’e kada fulan simu saláriu de’it la halo servisu tanba la fó kompetensia mai ami, entaun orsamentu 2025 tau boot ba Munisípiu Governu tenke fó ona kompetensia ba Munisípiu,” Rangel dehan.
Iha sorin seluk, Deputadu Bankada PD, António da Conceição “Kalohan” reforsa tan katak, tenke fó duni kompetensia ba Munisípiu sira hala’o servisu tanba Governu tau ona orsamentu boot ba Munisípiu.
“Loos duni funsionariu sira iha Munisípiu ne’e tenke iha duni responsabilidade no sira nia intendimentu ba kapasidade mak halo buat hotu so’e fila mai Governu sentrál. Entaun ita iha razaun tebes atu ko’alia kona-ba forma preparasaun hodi fó kompetensia ba Munisípiu sira hala’o servisu,” Kalohan tenik.
Husi preokupasaun ne’e, Primeiru-Ministru Kay Rala Xanana Gusmão hateten, bainhira ko’alia kona-ba desentralizasaun mak halo de’it desentraliza no la komprinede atu hala’o servisu oinsa.
“Dalabarak ita ko’alia kona-ba desentralizasaun ema barak hanoin ita desentraliza de’it, ita la komprinde atu halo saida, faze saida, maibé ha’u temi ona ita iha faze tolu agora hakbiit hela ema, tanba ita la hakbiit ema ba to’o iha Munisípiu sira ladun halo servisu ho másimu,” Xanana hateten.
Governu prepara hela ema oinsá atu ka’er kona-ba finansa, planeamentu iha Munisípiu tenke prepara ho di’ak no iha futuru sei implementa servisu hotu ho di’ak.
Entretantu, OJE 2025 ne’ebé aloka ba Munisípiu hotu iha teritoriu nasionál kada Munisípiu sei hetan millaun $7 hodi utiliza ba atividade hotu iha Munisípiu sira no prepara ba prosesu desentralizasaun.
Jornalista: Hortencio Sanchez
Editor: Florencio Miranda Ximenes
