DILI, 12 novembru 2024 (TATOLI) – Prezidente Komite 12 de Novembru Interinu, Filipe Rodrigues, husu ba juventude rezisténsia fó kontribui maka’as ba luta libertasaun nasaun nian no husu ba joven sira agora tenke kontribui maka’as ba dezenvolvimentu.
“Husi prosesu moruk ne’ebé joven sira iha pasadu halo mak ohin loron kontribui ba Timor-Leste hetan nia independensia no hamrik hanesan nasaun soberanu ida. Ba joven agora tenke buka atu estuda maka’as hodi luta ba dezenvolvimentu lori nasaun ne’e ba futuru ida nabilan. Agora dadaun Governu fasilita timoroan hotu eskola gratuita hahú hosi Pre-Eskolar to’o sekundariu, joven sira tenke estuda maka’as atu hetan valor di’ak tama iha Universidade Estadu nian ne’ebé selu baratu, laiha razaun atu joven sira lakoi ba eskola, imi mak futuru nasaun nian,” Filipe hateten iha nia intervensaun bainhira komemora aniversariu masakre Santa Cruz ba dala-33 iha semiteriu Santa Cruz, tersa ne’e.
Nia dehan, Masakre Santa Cruz nu’udar funu joventude rezistensia nian, funu sidade nian ne’ebé sai oksijenia atu tulun funu tomak iha teritoriu nasionál iha frente armada no klandestina iha tempu ne’ebá.
Tuir nia, hanoin fali ba tinan 33 kotuk joven barak iha sidade Dili komesa halai namkari buka fatin hodi subar iha komunidade sira nia uma, balu fakar ona raan iha fatin ne’e tanba objetivu ida de’it ba ukun rasik aan.
“Hanoin hikas ba kotuk iha tempu hanesan agora ne’e ita ne’ebé sei moris barak mak halai namkri, balu ba buka ema nia uma atu subar, balu mate no fakar ona sira nia ran iha fatin ne’e, barak mós hetan kapturasaun hosi militar Indonézia nian iha fatin ne’e, luta sira ne’e hodi hodi kontribui ba ita nia ukun rasik aan, ikus ita hetan duni liberdade,” Filipe hakotu.
Nia hatutan, bainhira mosu masakre Santa Cruz joven barak fó aan ba mate, la’ós de’it joven FRETILIN maibé APODETI, UDT nia oan barak mós fó hotu kontribuisaun hodi mate ho bala musan Indonézia nian iha Santa Cruz.
Jornalista: Hortencio Sanchez
Editór: Florencio Miranda Ximenes
