DILI, 14 novembru 2024 (TATOLI) – Autoridade Inspesaun no Fiskalizasaun Atividade Ekonómiku Sanitária no Alimentár (AIFAESA,I.P) prepara ona atu ba munisípiu hotu hodi halo inspensaun ba sasan merkadu, maibé zona fronteirisa mak atu uluk.
“Hahú aban ita-nia ekipa sira atu tun ba munisípiu hotu liu-liu ba área fronteirisa tanba ita atu tama ona natal no tinan foun, entaun ita halo inspesaun ba sasan iha merkadou sira klaru ke hahan sira liu prazu ida- ne’e, maibé ita nafatin servisu, oinsá atu deteta no samada atensaun ba ita-nia operadór ekonómiku atu sira bele kumpre no selu koima”, Inspetora AIFAESA Odete da Silva Viegas, dehan iha Hotel Timror, ohin.
Viegas dehan, loja sira ne’ebé mak faan hahan liu prazu, laos AIFAESA la ba halo inspesaun, maibé sei tuir posesu, entaun loja SEARA iha Pantai-Kelapa durante ne’e nia komete iregularidade, dezde 2022, entaun sansaun fó ba sira, entaun laos de’it ida-ne’e maibé iha mos loja seluk tan ne’ebé mak ekipa sira tun halo ona levantamentu depois diresaun operasionál tun hetan infrasaun sei haruka informasaun sira ne’e ba departamentu jurídiku atu halo pareser mai iha inspetór, depeois inspetór foti desizaun.
“La signifika katak ami tun ami taka kedas lae, maibé tenke iha prosesu ida hafoin ita to’o desizaun ida katak tenke taka temporáriu no taka ne’e mós atu eduka sira ba oin labele komete sasan sira ne’ebé mak hanesan, dahuluk mak obrigasaun sira tenke selu koima, daruak mak fó asesoria ba sira atu taka atu sira hadia sira-nia armazenamentu no labele halo tan fraude balun, normalmente ita fó koima hahú husi $250 ba leten maibé sira-nia infrasaun ladún todan, ita fó tuir koima ne’ebé mak iha nivel, maibé se todan ita fó koima ne’ebé mak todan to’o $5000, se sira halo nafatin mak ita taka, maibé daudaun sira tenke selu koima no tenke hadia sira-nia fatin”, nia haktuir.
Tanba ne’e, Inspetora AIFAESA husu ba konsumidór sira atu hola hahan tenke haree data espire, tanba ema balun ba la haree foti de’it naan sira ne’e, depois mai to’o uma mak foin deteta, tanba ne’e husu ba populasaun sira, bainhira haree hahan liu prazu labele hola no fó hatene ba parte relevante atu foti atuasaun urjente.
Jornalista : Felicidade Ximenes
Editór : Zezito Silva
