DILI, 14 novembru 2024 (TATOLI) — Autoridade Inspesaun no Fiskalizasaun Atividade Ekonómiku Sanitária no Alimentár (AIFAESA,I.P) hala’o semináriu Internasionál kona-ba papel Aifaesa atu garante kualidade produtu ba konsumidór sira iha Timor-Leste.
“Papel AIFAESA importamte no krítiku tebes atu tau matan ba kualidade no seguransa produtu ne’ebé disponibiliza ba povu no mós atu garante katak operadór ekonómiku sira bele kumpre regra ne’ebé mak estabelesidu no fó seguru ba ita-nia konsumidór sira iha ita-nia rain”, Odete da Silva Viegas informa iha nia diskursu iha Hotel Timor, ohin.
Viegas hateten, atividade workhop ida-ne’e atu fó importánsia hodi hametin liután esforsu koletivu ida ne’ebé atu tane aas konsumidór sira-nia direitu. Workshop ida-ne’e atu bele hasa’e konsiénsia kona-ba tendénsia globál ba seguransa produtu hotu no mós reforsa servisu inspesaun, fiskalizasaun no kontrolu prátika ba deteksaun sira no hametin liután koordenasaun servisu entre liña setorál hotu atu bele hadia prestasaun ne’ebé mak di’ak ba públiku no ikus mak buka solusaun hamutuk ba dezafiu sira ne’ebé durante AIFAESA no entidade sira enfrenta atu iha futuru hadia papel AIFAESA nian.
Iha fatin hanesan, Vise Primeiru-Ministru no Ministru Koordenadór ba asuntu Ekonómiku no Ministru Turizmu no Ambiente, Francisco Kalbuadi Lay, dehan AIFAESA nia papel importante atu haree produtu sira atu bele fó benifiisu ba konsumidór sira.
“Ita boot sira-nia papel mak ema nia moris ida ne’ebé mak relasiona ho kontrolu no fiskaliza diretamente ba povu no komunidade iha ita-nia rain, maibé servisu ida-ne’e la fasil, entaun ho lideransa ne’ebé mak iha ona esperiénsia presiza haree no kontrolu atu produtu sira bele fó benifisiu di’ak ba ita-nia konsumidór sira”, Francisco Kalbuadi Lay informa.
Lay rekorda, hafoin Timor-Leste adere ba OMK, Governu mós presiza prepara aan atu tama Asean, entaun ho pasu ida-ne’e mak Timor-Leste liu ona iha WTO, maibé servisu lubuk mak AIFAESA tenke kumpre hamutuk ho Ministériu sira atu priénse no mínimu lejislasauan 20 ne’ebé mak tenke kumpre to’o iha 31 dezembru.
“Entaun husi ne’e ha’u fiar katak ita boot sira-nia servisu la fasil, maibé iha ema lubuk ida mak iha esperiénsia tebes atu ajuda ita”, nia esplika.
Reprezentante Organizasaun Mundiál Saúde iha Timor Leste, Arvind Mathur, hateten AIFAESA nia papél iha salvaguarda seguransa no soberania ai-han nian mak folin-laek. Seguransa Ai-han la’ós de’it kestaun tékniku ida, ida-ne’e aspetu fundamentál ida ba saúde públika. Ida-ne’e hala’o papél krusiál ida hodi hasa’e seguransa ai-han, hadi’a nutrisaun no hametin dezenvolvimentu ekonómiku.
“Hodi hamenus moras sira ne’ebé mai hosi ai-han, ita bele hamenus kustu sira kuidadu saúde nian, hametin kapitál umanu no produtividade. Nasaun sira ho regulamentu seguransa ai-han ne’ebé forte iha pozisaun di’ak liu atu envolve iha komérsiu globál, nune’e loke oportunidade sira ba progresu ekonómiku jerál”, Arvind Mathur relata.
Nia afirma, semináriu ida-ne’e krusiál tebes, liuliu tanba Timor-Leste foin lalais ne’e adere ba WTO no kontinua nia progresu ba adezaun ba ASEAN. Padraun Seguransa Ai-han Codex nian ne’ebé refere iha Akordu WTO hala’o papél xave ida iha rezolusaun disputa komersiál no defende padraun seguransa ai-han globál sira.
“Aleinde ne’e, Polítika Seguransa Ai-han ASEAN nian subliña importánsia atu aliña ita-nia padraun seguransa ai-han nasionál sira ho norma internasionál sira, partikularmente sira ne’ebé estabelese hosi Komisaun Codex Alimentáriu, iha kontestu ida-ne’e, seguransa ai-han nu’udar prioridade urjente ida ba Timor-Leste.
Jornalista : Felicidade Ximenes
Editór : Zezito Silva
