DILI,14 novembru 2024 (TATOLI) – Vise-Primeiru-Ministru hanesan mós Prezidente Komisaun Organizadora ba eventu Promosaun Turizmu Nasionál, Mariano Assanami Sabino, ho ekipa hasoru malu ho Prezidente-Repúblika, José Ramos-Horta, hodi relata progresu preparasaun ba eventu Promosaun Turizmu Nasionál ne’ebé sei realiza iha Timor-Leste ho atividade oioin.
“Enkontru ho Prezidente Repúblika atu briefin ba Prezidente, liuliu ba atividade Promosaun Turizmu Nasionál, ita hotu hatene katak ho vizaun Prezidente nian ba promosaun turizmu nasionál, ita iha komponente haat du’urante fulan novembru nia laran,” Assanami tenik ba jornalista sira iha Palásiu Prezidensiál Dili, kinta ne’e.
Vise PM Assanami dehan, komponente haat ne’e ida mak espozisaun siénsia no teknolojia, ne’ebé lidera hosi Ministru Ensinu Superiór halo ona atividade konferénsia internasionál ida ne’ebé Lauriadu Novel ba Páz sira iha mundu partisipa iha fulan-agostu liuba, no nia kontinuidade sei hala’o fali espozisaun siénsia no teknolojia, ne’ebé mak sei realiza iha loron rua 15-16 novembru.
Enkuantu, komponente seluk mak, sei hala’o desportu ne’ebé sei halo iha loron 16 fulan-novembru tinan ne’e, hanesan Dili Maratona ne’ebé sei partisipa hosi atleta sira iha nasaun oioin iha mundu.
“Depois ne’e, sei iha mós atividade Taekwondo iha loron 26-27 fulan-novembru, ne’ebé mak ita sei halo iha Dili, husu atu atleta Timoroan sira partisipa no sei loke mós ba atleta internasionál sira sei mai partisipa,” nia dehan.
Entretantu, atividade desportu seluk mak sei realiza Boxe iha loron 30 fulan-novembru 2024. Atividade ne’e sei loke ho profesionál no atleta internasionál sira mós sei kompete.
Nune’e iha mós Timor Island Adventure ne’ebé mak sei hahu iha loron 08-13 fulan-dezembru tinan nee, sei komesa hosi Malaka no sei termina iha Baukau.
“Ida ne’e mak atividade ne’ebé mak sei halo, progresu la’o di’ak tebes no ida ne’e maka ami hato’o ba Prezidente tanba vizaun Prezidente nian, lideradu hosi Vise-PM nain rua, Vise Primeiru mak nu’udar konselleiru no hau hanesan Prezidente komisaun organizadora,” nia afirma.
Nia dehan tan, “atividade ne’e inisia hosi Prezidente Repúblika, orsamentu mós Prezidente Repúblika mak tau, kona-ba montante hira ba atividade sira hotu sira parte tékniku mak hatene, hau hanesan prezide de’it atividade sira tanba hetan fiar hosi Xefe Estadu.”
Atividade hirak ne’e hanesan atividade kontinuasaun hosi festival Rabilau ne’ebé hala’o ona ho susesu. Objetivu prinsipál hosi atividade hirak ne’e atu promove Timor-Leste nia kultura no área turizmu sira.
Jornalista: Hortencio Sanchez
Editór: Florencio Miranda Ximenes
