DILI,14 novembru 2024 (TATOLI) – Prezidente Repúblika, José Ramos-Horta, halo inagurasaun ba Eskola Ensinu Báziku Fillial (EBF) Kamlai, Postu Administrativu Maubessi, Munisipiu Ainaro, foin lalais ne’e.
Eskola ne’e harii tanba hetan apoiu másimu husi Governu Austrália no servisu hamutuk Cristy Gusmão, ne’ebé hari’i “Fundasaun Alola” ne’ebé serbisu hamutuk ho ekipa “Spend it Well” ho voluntariamente.
“Ita Agradese ba Doador sira husi Austrália, agradese mós ba Cristy Gusmão nia mak hari’i Alola Fundation, servisu di’ak maka’as iha Dili, bolu feto sira ne’ebé vitíma violénsia doméstika la’ós de’it fó fatin de’it ba sira, maibé fó mós protesaun ba sira, halo training ba sira, fa’an sasan, halo sasan ho kualidade, sai ONG ida ne’ebé forte ho real, jestaun ne’ebé di’ak. Entaun Cristy Gusmão mak hateten ba ha’u kona-ba eskola ida ne’e. Ha’u agradese ba tiu ou tia sira ne’e (Spend it Well) tanba sira halo eskola barak ona iha Timor-Leste,” Ramos Horta hateten liuhosi nota ne’ebé Agência TATOLI asesu hosi media Palásiu Prezidensiál Dili, ohin.
Iha okaziaun ne’e, Xefe Estadu Agradese ba Governu Austrólia ne’ebé tinan barak ona ajuda mai Timor-Leste, nia parte kontente tebes no sempre disponivel bainhira konvida nia mai, tanba Edukasaun importante duni ba oan sira nia futuru.
“Ba tulun sira ne’e, klaru sira nia parseiru ofisiál bo’ot mak Governu Austrália, Austrália parseiru númeru dahuluk no bo’ot liu iha mundu depois segundu Uniaun Europeia ne’ebé apoiu ona Timor-Leste. Ha’u mai iha eskola EBF Kamlai ne’e, ha’u simu konvite, ha’u nunka hatete la’e, ka rejeita konvite ruma ba fatin ne’ebé ha’u ba. Fulan ruma liu ba ami ba fatin ida Aileu do’ok tebe-tebes, ha’u ba to’o iha ne’eba no dala ida ba Bobonaro ha’u la hatene iha ne’ebé, to’o agora deputadu, membru governu ruma seidauk ba ha’u úniku mak ba to’o iha ne’eba, ema iha ne’eba araska liu, lori ajuda oituan ba sira, halo uma ida ba família iha ne’eba,” Horta tenik
Totól Fundu husi ekipa “Spend it well” ne’ebé apoiu ba konstrusaun eskola ne’e ho montante $70,000.00. Eskola Ensinu Báziku Fillial (EBF) Kamlai ne’e harii tanba kuantidade númeru estudante sira barak no bele reforsa mós dezenvolvimentu iha eskola Ensino Básico Central Maubessi Villa.
Totál estudante iha eskola fillial Kamlai hamutuk 136, Estudante Mane hamutuk 78 no estudante feto hamutuk 58 ne’ebé fahe ba klasse 1º ano, 2ºano no 3º ano.
Fasilidade iha Eskola ne’e menus kadeira ho meja, daudaun ne’e Ministériu Edukasaun halo ona akizasaun ba materiál sira iha armajen, semana tuir mai sei kompleta kadeira ho meja foun, inklui livru ne’ebé agora daudauk iha dalan rihun 70 livru ba estudante sira.
Ministériu Edukasaun prosede tiha ona ninia prosesu aprovizionamentu, nune’e iha tempu badak sei kompleta no sei to’o iha Timor hodi apoiu mós ba eskola públika no eskola privadu sira iha territóriu nasionál tomak.
Jornalista: Hortencio Sanchez
Editór: Florencio Miranda Ximenes
