DILI, 14 novembru 2024 (TATOLI)– Prezidente Repúblika, José Ramos-Horta, hala’o abertura ba festivál ai-horis, ai-han, no arte ho tema “Go Green, Buy Local” – selebrasaun loron tolu ba empendedorizmu feto timoroan no sustentabilidade ambientál, ne’ebé hala’o iha Palásiu Prezidensial Dili.
Festivál ne’ebé organiza husi Unidade Empoderramentu Ekonómiku Feto nian (EEW), vendedór feto lokál sira ne’ebé hatudu produtu artezanatu, ai-horis, no ai-han tradisionál sira.
“Objetivu hosi festivál ne’e atu hasa’e vizibilidade ba feto emprezária sira. Kria oportunidade sira ba envolvimentu entre vendedór no kliente. Ajuda feto sira estabelese sira nia marka negósiu. Rekoñese no selebra feto Timoroan sira nia susesu. Promove sustentabilidade ambientál no konxiénsia kona-ba resiklajen,” Ramos-Horta tenik bainhira halo lansamentu ba produtu hirak ne’e.
Eventu ne’e hahú ho esperiénsia degustasaun hahán espesiál husi grupu vendedór ai-Han Timor Street Food, ne’ebé oferese hahán tradisionál Timor nian ba distintu bainaka sira, inklui reprezentante Governu, parseiru dezenvolvimentu, no membru korpu diplomátiku sira.
Festivál ne’ebé hala’o du’urante loron tolu ne’e inklui, Espozisaun ai-horis no arte nian ne’ebé hatudu feto emprezária lokál sira. Kompetisaun ba exibisaun kriativu di’ak liu no aprezentasaun tenda nian. Oportunidade interkámbiu kulturál ho embaixada sira ne’ebé partisipa atividade interativu inklui sorteiu ba prémiu no rifa. Hatudu prátika negósiu sustentável sira, vendedór ai-hán no bebida lokál sira.
“Forsa husi ita-nia nasaun iha inovasaun no determinasaun husi ita-nia feto emprezária sira, no sira-nia kompromisu ba prátika negósiu ne’ebé sustentável,” Prezidente Ramos-Horta tenik.
Ramos-Horta dehan tan, “festivál ida-ne’e reprezenta oportunidade úniku ida atu hatudu talentu inkrível sira hosi ita-nia feto na’in ba negósiu lokál sira enkuantu promove konxiénsia ambientál, hodi halibur ita-nia komunidade nia forsa kriativu sira ho advogadu ambientál sira, ita harii futuru ida ne’ebé sustentável no ekuitativu liu ba Timor-Leste.”
Inisiativa ida-ne’e aliña ho Prezidente nia kompromisu atu apoia feto sira-nia empoderamentu ekonómiku enkuantu promove sustentabilidade ambientál no prezervasaun kulturál.
Jornalista: Hortencio Sanchez
Editór: Florencio Miranda Ximenes
