DILI, 15 novembru 2024 (TATOLI) – Prezidente Repúblika, José Ramos-Horta, sesta ne’e, iha Palásiu Prezidensiál Dili ofisialmente hala’o abertura ba edisaun daruak Sci-Tech EXPO 2024.
Eventu ne’e hala’o durante loron rua hahú 15 to’o 16 Novembru. Iha ne’ebé marka pasu signifikativu iha viajen Timor-Leste nian ba avansu teknolojiku no inovasaun.
Sci-Tech EXPO 2024 nu’udar parte ida iha Programa Promosaun Turizmu Timor-Leste nian iha tinan 2024 ho tema “Siénsia, Teknolojia no Inovasaun: Dalan ba Transformasaun no Dezenvolvimentu Sustentável iha Timor-Leste.”
Eventu ne’e, halibur hamutuk partisipante na’in-36, inklui instituisaun Ensinu Superiór, ajénsia internasionál, kompañia telekomunikasaun, no empreza teknolojia prinsipál sira.
Espozisaun loron rua ne’e hatudu programa ida ne’ebé komprensivu inklui espozisaun siénsia no teknolojia, feira ensinu superiór, kompetisaun estudante, no atividade kulturál sira.
“Espozisaun ida-ne’e la’ós de’it hatudu teknolojia ida-ne’e inklui ita-nia nasaun nia kompromisu atu halo inovasaun sai hanesan katalizadór ba dezenvolvimentu sustentável,” Prezidente Horta hateten bainhira halo abertura ba atividade ne’e.
Nia dehan tan, “liuhusi investe iha edukasaun siénsia no teknolojia, ita la’ós de’it harii infraestrutura; ita investe iha mehi no kapasidade ita-nia joven sira-nian ne’ebé sei lori Timor-Leste ba futuru.”
Nia esplika, eventu ne’e ho objetivu atu estimula interese iha siénsia no teknolojia enku antu promove solusaun teknolojia prátika sira ne’ebé adapta ba kontestu úniku Timor-Leste nian.
Ida-ne’e serve hanesan plataforma ida atu hatudu projetu peskiza, haburas parseria edukasionál sira, no dezenvolve abilidade kritiku ba estudante sira.
Sci-Tech EXPO 2024 nakloke ba públiku no iha atividade lubuk ida ne’ebé hatudu nasaun nia kompromisu ba progresu iha setór oioin.
Jornalista: Hortencio Sanchez
Editór: Florencio Miranda Ximenes
