DILI, 19 novembru 2024 (TATOLI) – Eis Embaxadora Timor-Leste ba Nova Zelandia Felicidade de Sousa Guterres, tersa ne’e, iha Palásiu Prezidensiál Dili hasoru malu ho Prezidente Repúblika, José Ramos-Horta, hodi relata progresu servisu durante tinan tolu iha Nova Zelandia.
“Ida ne’e hanesan regra normal ida, bainhira Embaixador ida ramata nia misaun tenke mai aprezenta-aan ba Prezidente Repúblika hodi relata progresu servisu sira hotu, entaun ha’u nian relata saida mak konsege alkansa ona iha Nova Zelandia,” Embaixadora Felicidade hateten.
Embaixadora ne’e dehan, durante tinan tolu iha Nova Zelandia hala’o misaun hanesan diplomata, servisu efetivu ne’ebé halo iha de’it tinan rua tanba tinan ida akontese Covid-19, nune’e labele hala’o servisu ho másimu.
“Ha’u nia servisu efetivu iha ne’ebá so tinan rua de’it tanba tinan ida ita sofre Covid-19 entaun labele halo buat ida, iha tinan rua nia laran mak ita konsege konvense Governu Nova Zelandia atu halo aprovasaun atu Timor-Leste bele haruka traballadór ba servisu iha Nova Zelandia. Tuir programa maiu tinan oin ita bele haruka ona ita nia traballadór ba servisu iha Nova Zelandia,” nia dehan.
Embaixadóra ne’e dehan tan, “antes ha’u nia misaun termina, haruka ona karta ida ba Sekretáriu Estadu Formasaun Profesionál Empregu (SEFOPE), atu nune’e sira bele haruka ona sira nia tékniku sira ba Nova Zelandia atu trata asuntu tekniku sira hanesan akordu servisu atu ita bele hahú ona rekrutamentu ba traballadór sira.”
Tuir pedidu ne’ebé hetan ona aprovasaun hosi Governu Nova Zelandia katak traballadór sira ba servisu maibé la’ós de’it servisu bele tuir mós formasaun atu nune’e traballadór sira bele iha koinesimentu klean, la’ós de’it osan.
“Iha pedidu ne’ebé ami hato’o hetan ona aprovasaun ne’e katak ita haruka traballadór sira ba maibé la’ós de’it servisu, sira bele tuir mós formasaun ruma iha lian ingles, akontabilidade no formasaun oioin ne’ebé Nova Zelandia iha, atu nune’e sira fila la’ós lori de’it osan maibé sira bele lori mós ho esperiensia ka skil ruma,” nia tenik.
Servisu ne’ebé mak Nova Zelandia sei ofrese ba traballadór timoroan sira iha área agrikultura no hortikultura hanesan ku-aifuan no seluk tan ho nia durasaun fulan sia.
“Nova Zelandia barak liu iha agrikultura nian, ku-aifuan tanba iha ne’ebá ai-fuan barak, maibé ita nia traballadór sira ba servisu tuir tempu aifuan nian, bainhira aifuan hotu sira bele fila, nia durasaun fulan sia, bainhira aifuan iha fali mak ba fali, ita hanoin iha faze primeiru bele haruka uluk traballadór na’in-50 hanesan ne’e no empreza sira iha ne’ebá presiza tan mak ita sei haruka tan traballadór sira ba,” nia dehan.
Entratantu servisu seluk ne’ebé eis Embaxadora ne’e halo mak hametin liutan kooperasaun iha área edukasaun nian oinsa Nova Zelandia bele ofrese bolsa estudu ba timoroan sira no simu nafatin timoroan sira atu ba estudu iha nasaun referidu.
Tuir dadus ne’ebé iha timoroan ne’ebé hetan bolsa estudu hodi estuda hela iha Nova Zelandia hamutuk na’in-50 liu no estudante hirak ne’e hasai kursu mastradu no lisensiadu.
Jornalista: Hortencio Sanchez
Editór: Florencio Miranda Ximenes
