BAUCAU, 19 novembru 2024 (TATOLI) – Komandu Polísia Nasionál Timor-Leste (PNTL) Munisípiu Baucau kontinua buka-tuir autór sira-ne’ebé envolve iha konfrontu iha aldeia Lekiloi-uatu, suku Triloka, postu administrativu Baucau Vila.
Kazu referida akontese iha loron-sábadu, 16 novembru bainhira joven sira partisipa serimónia kore-metan nune’e mosu provokasaun hodi kontinua konfrontu hanesan tuda malu.
“Parte Polísia kontinua buka-tuir autór sira-ne’ebé envolve iha kazu referida,” Komandante PNTL Munisípiu Baucau, Superintendente Xefe António Maria de Sá hateten iha Vila Nova, tersa ne’e.
Maske parte seguransa to’o kedas iha lokál akontesimentu maibé konfrontasaun ne’ebé deskonfia envolve husi organizasaun arte-marsiál rezulta vítima na’in-rua hetan kanek kmaan, uma komunidade haat estragu no motorizada lima kompostu husi ida hetan sunu no haat seluk rahun.
De Sá konsidera kazu ne’e sei responsabiliza pesóal, maske PNTL bolu ona líder organizasaun arte-marsiál hodi koopera relasiona ho autór prinsipál sira-ne’ebé envolve iha kazu ne’e.
“Kazu ne’e iha ona prosesu investigasaun,” Superintendente Xefe António de Sá akresenta.
Komandu PNTL Baucau identifika ona autór na’in-ida inisiál N nu’udar estudante ne’ebé deskonfia nu’udar provokadór hodi hamosu konfrontu ne’e.
Jornalista : Natalino Belo
Editór : Evaristo Soares Martins
