DILI, 19 novembru 2024 (TATOLI) – Reprezentante UNICEF iha Timor-Leste, Patrizia di Giovanni, tersa ne’e, hasoru malu ho Prezidente Repúblika, José Ramos-Horta, iha Palásiu Prezidensiál Dili hodi konvida Xefe Estadu atu partisipa iha komemorasaun loron labarik mundiál ne’ebé sei selebra loron 20 Novembru iha Timor Plaza Dili ho tema prinsipál ‘Rona ba Futuru’.
“Hasoru malu ho Prezidente Repúblika ha’u rasik konvida nia atu partisipa iha komemorasaun loron mundiál labarik ne’ebé sei akontese aban iha Timor Plaza Dili, iha ne’ebá ami sei halo supreza ida ba Prezidente Horta. Ami kontente tanba Prezidente aseita atu partisipa iha komemorasaun ne’e,” Patrizia hateten.
Nia dehan, tema global ne’ebé foti katak ‘Rona ba Futuru’ tuir servisu UNICEF nian oinsa mak rona ba labarik sira nia hanoin, oponiaun no ideia ruma kona-ba labarik sira nia moris kada loron.
“Tema ne’e Prezidente Repúblika kontente, ita hatene katak Prezidente Repúblika mós gosta liu rona labarik sira, halimar ho labarik sira,” nia tenik.
Tuir UNICEF, labarik hotu tenke iha oportunidade hetan edukasaun ne’ebé mak di’ak. Haree ba situasaun Timor-Leste nian labarik balun sei faan sasan iha dalan ninin, UNICEF sei ko’alia ho Governu oinsa haree ba situasaun sira ne’e tanba lei internasionál ko’alia sai ona katak labarik iha direitu ba moris di’ak no asesu ba edukasaun no labele halo servisu todan.
Konvensaun kona-ba direitu labarik nian
Konsidera katak, tuir prinsípiu sira ne’ebé proklama tiha ona iha Karta Nasaun Unida nian, rekoñesimentu kona-ba dignidade ne’ebé iha kedas ona no direitu ne’ebé hanesan no lábele hasai husi membru família humanu tomak mak hanesan baze ba liberdade, justisa no dame iha mundu rai klaran.
Hanoin katak, estadu barak ne’ebé tama iha Nasaun Unida, reafirma fali iha Karta Nasoins Unidas nian laran, sira nia fiar ba direitu fundamental ema nian no dignidade no valor ema nian, no mós determina atu foti progresu sosiál no estandar moris ne’ebé diak liu iha liberdade ida mak luan liu.
Rekoñese katak, Nasaun Unida iha Deklarasaun Universal Direitus Humanus no Konvensaun Internasionál hirak ba Direitus Humanus, proklama no aseita tiha ona katak ema ida-idak iha direitu atu hetan direitu no liberdade sira ne’ebé hateten tiha iha laran, labele haree ba distinsaun oin-oin, hanesan rasa, kor, sexu, lian, relijiaun, opiniaun polítika ka seluk, moris hun nasionál ka sosiál, rikusoin, moris ka pozisaun seluk.
Haree katak, iha Deklarasaun Universal Direitus Humanus laran, Nasoins Unidas proklama tiha ona katak labarik iha direitu atu hetan kuidadu no tulun espesiál. Fiar metin katak família, hanesan grupu fundamentál sosiedade nian no hanesan ambiente naturál ba dezenvolvimentu no moris diak membru família nian liu-liu labarik sira, tenki hetan protesaun no tulun ne’ebé presiza atu nune’e família iha kapasidade atu simu responsabilidade ne’e iha komunidade nia laran.
Rekoñese katak labarik, atu dezenvolve diak liu tan ninian personalidade, sei moris iha ambiente família ida, iha ambiente sosiadade ne’ebé hakmatek, hadomi no komprende malu. konsidera katak labarik tenki prepara atu moris nu’udar ema mesak ida iha sosiedade nian laran no haboot ho espíritu ne’ebé proklama tiha iha Karta Nasoins Unidas nian, no liu-liu ho espíritu dame, dignidade, toleránsia, liberdade, igualidade no solidariedade nian.
Hanoin katak nesesidade atu fo kuidadu partikulár ba labarik ne’ebé tau mak deklara tiha ona iha Deklarasaun Jenebra kona-ba Direitu Labarik nian iha tinan 1924 no iha Deklarasaun kona-ba Direitu Labarik nian ne’ebé adopta tiha ona husi Nasoins Unidas iha loron 20 fulan-novembru 1959 no rekoñese tiha ona iha Deklarasaun Universal Direitus Humanus nian, iha Konvensaun Internasionál kona-ba Direitu Sivil no Politiku (liu-liu iha artigu 23 no 24), iha Konvensaun Internasionál kona-ba Direitu Ekonómiku, Sosial no Kultura (liu-liu iha artigu 10) no iha estatutu no instrumentu relevante sira husi ajensia espesiál sira no organizasaun internasionál sira ne’ebé hanoin kona-ba labarik nia moris diak.
Hanoin katak, hanesan hakerek tiha ona iha Deklarasaun (kona-ba) Direitu Labarik nian, “labarik, tanba razaun seidauk iha maturidade fíziku ka mentál, prezisa hetan hahalok protesaun no kuidadu, inklui mós protesaun legál ne’ebé loos, molok moris no mós wainhira moris tiha.”
Hanoin fali-ba, provisaun sira husi Deklarasaun Prinsipiu Sosiál no Legál nian kona-ba Protesaun no Moris Diak Labarik nian, ho Referénsia Espesiál atu Hadia Kolokasaun no Adopsaun Nasionál no Internasionálmente; Regra Standar Minímu Nasoins Unidas nian ba Administrasaun Justisa Juveníl (Regra Beijing), no Deklarasaun kona-ba Proteksaun ba Feto no Labarik iha Emerjensia no iha Funu nia laran.
Rekoñese katak, iha rai hotu-hotu iha mundu rai klaran, iha labarik sira ne’ebé moris iha kondisaun ne’ebé susar teb-tebes, no tanba ne’e sira presiza konsiderasaun espesiál. haree importansia husi tradisaun no valór kulturál rai ida-idak nian ba protesaun no dezenvolvimentu diak ba labarik. Rekoñese importansia husi kooperasaun internasionál atu halo diak liu kondisaun moris labarik nian iha Estadu ida-idak.
Jornalista: Hortencio Sanchez
Editór : Florencio Miranda Ximenes
