Ermera, 20 novembru (TATOLI) – Xefe Suku Lau-Ana, Miguel Gomes, hateten iha aldeia lima husi Suku Lau-Ana mak seidauk asesu ba bee-moos.
”Suku ne’e Lau-Ana hamutuk aldeia 10, aldeia lima asesu ona bee-moos, aldeia hirak ne’e mak Kirilelo, Rouulu, Limilohi, Grotu no Bandeira Huun no aldeia lima seidauk asesu ba bee-moos mak aldeia Leobasa, Halosai, Hatugeo, Liabe no Rebousloi’, ‘Miguel Gomes, hateten ba jornalista sira iha Sede Suku Lau-Ana, ohin.
Nia dehan, iha aldeia lima mak autoridade lokál sira esforsu ho programa PNDS hodi uza bee-bomba hodi instala ba komunidade sira iha aldeia lima hodi asesu ba nesesidade nian hasesan Leobassa, Halosai, Hatugeo, Liabe no Rebousloi, entaun aldeia ne’e mak ita esforsu hamutuk ho PNDS maibé seidauk bele atinje maske iha ona bomba bee, maibé enerjia elétrika mak ladún forsa, entaun halo bee ne’e seidauk halo nia funsaun”, nia afirma.
Xefe Suku esplika, PNDS esforsu hela atu instala bee ba aldeia lima inklui eskola ida no postu saúde ida maibé iha alternativu seluk mak bee matan iha maibé ida-ne’e tama iha kategoria mega -projetu tanba bee matan iha Ramelau hun kedas, entaun durante ne’e xefe suku na’in-tolu hanesan Katrai-Kraik, Katrai Leten no Lau-Ana esforsu hela atu doadór balun haree bee-matan ne’e hodi bele fornese ba komunidade sira.
” Bee-matan ne’e sai alternativu ba suku tolu Lau Ana, Katrai Kraik no Katrai Leten, entaun husi ne’e empreza balun haree ona, maibé distánsia dook no ita hetan tentativu no esforsu sira maibé rezultadu seidauk iha”, nia afirma.
Suku Lau-Ana ho totál populasaun hamutuk 3.959, iha uma-kain 991, mane hamutuk 1.989 no feto iha 1.970, husi ne’e komunidade maioria moris agrikultór.
Jornalista : Felicidade Ximenes
Editór : Zezito Silva
