DILI, 20 novembru 2024 (TATOLI) – Governu liu-husi Ministra Edukasaun (ME) rona preokupasaun hodi halo programa ne’ebé responde bá nesesidade labarik nian.
Ministra Edukasaun (ME), Dulce de Jesus Soares hato’o asuntu ne’e hafoin akompaña reprezentante UNICEF ho reprezentante labarik Timoroan aprezenta preokupasaun labarik timoroan nian ba Primeiru-Ministru (PM), Kay Rala Xanana Gusmão iha Palásiu Governu, kuarta ne’e.
Hafoin enkontru ho Primeiru-Ministru, Dulce de Jesus hato’o parabéns bá labarik timoroan hotu iha mundu tomak no mós iha mundu tomak ne’ebé mak ohin loron 20 Novembru 2024 selebra loron mundail labarik nian.
“Governu sei tau matan ba preokupasaun labarik sira iha Timor-Leste, liuliu sira ne’ebé mak ho idade 18 mai kraik, sei rona preokupasaun sira atu oinsa halo programa ne’ebé responde ba sira nia nesesiade,” Dulce hateten.
Preokupasaun ne’ebé labarik timoroan sira aprezenta bá Xefe Governu maka iha fatin barak iha timor Leste, labarik barak mak kaben sedu no sempre enfrenta violénsia doméstika, sofre bá mál nutrisuan, enfrenta violénsia emosionál no públiku konsidera ida-ne’e hanesan kazu baibain de’it iha komunidade nia leet.
Alende ne’e, labarik barak mós la asesu bá edukasaun tanba problema ekonómiku, labarik barak servisu makaas iha uma no la hetan tempu atu bá eskola no estuda.
Tanba ne’e, husu públiku atu proteze labarik sira hosi violasaun oioin ne’ebé hamate futuru labarik Timor nian.
Preokupasaun ne’e hatuur iha karta ida ne’ebé hakerek hosi labarik sira iha munisípiu Díli, Ainaro, Ermera ho Aileu.
TATOLI
