DILI, 20 novembru 2024 (TATOLI) – Komunidade Suku Ailok, Postu Administrativu Cristo Rei, Munisipiu Dili, realiza feira durante semana tolu hodi komemora loron Proklamasaun Independénsia Timor-Leste 28 Novembru ba dala-49.
Eventu ne’e hala’o halibur hamutuk mós komunidade sira iha Suku Viziñu sira hanesan Kamea, Becora, Hera no Bairu-Pite.
“Iha ne’e, ami hanesan juventude rezisténsia hamutuk ho ita nia inan-aman sira iha ne’e, sira ne’e uluk involve aan iha organizasaun rezisténsia nian kria eventu ida ne’e atu fó onra ba ita nia loron boot Proklamasaun Independénsia nian, fatin ida ne’e uluk hanesan mós kaixa klandestina nian naran Kaixa Rai-na’in, halibur komunidade sira iha Suku viziñu sira hanesan Bairu-Pite, Kamea, Ailok, Becora no seluk tan, sira mak mai hala’o feira ne’e,” Vise Prezidente Komisaun Organizadora, Gaspar da Silva hateten ba jornalista sira iha Karaumaten, ohin.
Nia dehan, eventu ne’e hahú loron 20 Novembru no ramata iha loron 08 Dezembru tinan ne’e. Feira ne’e komunidade sira dada tenda kiikoan hodi faan sira nia produtu lokál, ai-han lokál jogu tradisionál sira no seluk tan.
Feira ne’e abertura direta husi Prezidente Autoridade Munisipál Dili (PAM), Gregório Saldanha akompaña husi Sekretariu Estadu Asuntu Veteranu, César da Silva ‘Merak’.
Iha abertura, PAM Dili iha hato’o parabéns ba juventude Ailok no komunidade hotu ne’ebé hola inisiativa di’ak hodi realiza feira ne’e no la hetan apoiu husi Governu.
“Parabéns ba imi hotu iha Ailok, imi hola inisiativa di’ak tebes hodi kria eventu ida hanesan ne’e, maibé husu ba imi hotu iha ne’e labele kria konflitu durante feira la’o, fatin ne’e mós fatin rezisténsia ida tenke hamorin fatin ho imi nia atetude hodi kontribui ba dezenvolvimentu,” Gregório hateten.
iha fatin hanesan, Sekretariu Estadu Asuntu Veteranu, César da Silva ‘Merak’ louva ho komunidade Suku Ailok ne’ebé hala’o atividade ho osan rasik la husu apoiu ba Governu no ba oin Governu sei haree Suku sira ne’ebé ho inisiativa di’ak sei fó apoiu.
“Ida ne’e sira hala’o ho sira nia osan rasik entre komunidade sira, sira hanesan ema rezistensia, sira sente katak fatin ne’e mós fatin rezistensia ida entaun sira hola inisiativa hodi komemora loron Proklamasaun Independensia 20 de Novembru. Inisiativa hanesan ne’e di’ak tebes, maibé ba oin Governu sei haree Suku sira iha hanoin di’ak hanesan ne’e Governu sei fó apoiu,” Merak tenik.
Merak dehan, inisiativa sira hanesan ne’e parte ida mós atu valoriza istoria luta Timor-Leste nian atu jerasaun foun sira labele haluha no valoriza nafatin.
Jornalista: Hortencio Sanchez
Editór: Florencio Miranda Ximenes
