DILI, 20 novembru 2024 (TATOLI) –Prezidente Repúblika, José Ramos-Horta, alerta ba Governu atu tau atensaun másimu ba setór privadu atu bele kontribui ba hasa’e ekonomia rai laran.
“Governu tenke haree oinsa atu fó apoiu ba setór privadu sira, liuliu fó apoiu ba feto emprezariál sira, apoiu la’ós de’it ho diskursu ka liafuan, maibé tenke haree mekanizmu finanseiru atu tulun sira, nune’e bele hasa’e liutan ita nia ekonomia rai-laran,” Xefe Estadu hateten ba jornalista sira bainhira partisipa iha atividade Timor-Leste Women in Business Awards ne’ebé hala’o iha Novu Turizmu Dili, kuarta ne’e.
Ramos-Horta dehan, setór privadu barak mak iha divida, balu impaktu hosi Covid-19 no seluk tan, nune’e Governu labele nonok tenke buka meiu oinsa atu apoiu fundu ruma atu halo kman divida ne’ebé setór privadu sira hasoru.
“Iha Timor-Leste ha’u hatene setór privadu sira barak mak iha dividas, Governu tenke buka dalan atu fó apoiu ba sira, ida ne’e meiu ida atu hamoris ita nia ekonomia rai-laran, se Governu la haree asuntu hirak ne’e imposivel setór privadu sira atu hamoris ita nia ekonomia,” Horta dehan.
Alende ne’e, Xefe Estadu mós louva Assosiasaun Emprezarial Feto Timor-Leste (AEMTL-sigla portugés) ne’ebé konsege servisu hamutuk ho parseiru internasionál oioin hodi fó biban ba feto emprezarial sira atu hala’o atividade negósiu ho di’ak.
“Parabéns ba AEMTL ne’ebé servisu mka’as tebes hodi tane feto emprezarial timoroan sira, ne’e signifika tane ekonomia Timor-Leste nian, kria empregu ba timoroan sira feto no mane,” nia hakotu.
Jornalista: Hortencio Sanchez
Editór: Florencio Miranda Ximenes
