BAUCAU, 20 novembru 2024 (TATOLI) – Vendedór sira-ne’ebé hala’o negósiu husu ba Autoridade Administrasaun Munisipál Baucau atu aumenta fasilidade antes hahú atividade ekonomia iha merkadu Tuanau.
Vendedór Crispim Filipe Soares, esplika, nu’udar negosiante prontu koopera ho Autoridade Administrasaun Munisipál atu hamutuk dezenvolve di’ak liután sidade Baucau maibé presiza aumenta tán fasilidade báziku sira hanesan kanaliza liña eletrisidade, aumenta tanki bee-moos, fatin lixu no hadi’a di’ak liután saneamentu no estrada.
“Ami koopera nafatin maibé ami-nia fatin ne’e prepara di’ak hotu mak ami muda, agora realidade eletrisidade mós seidauk finaliza, bee-moos seidauk sufisiente no difikuldade sei barak,” Vendedór Crispim Soares argumenta iha merkadu Tuanau, kuarta ne’e.
Autoridade fasilita de’it fatin hanesan rai ho medida 4×4 no kada vendedór sira mak utiliza osan hodi konstrui rasik kioske iha merkadu referida.
Negosiante sira iha esperansa bainhira kondisaun preparadu automatikamente rendimentu bele aumenta tanba movimentu sei rame relasiona ho merkadu Tuanau nu’udar úniku iha Baucau Vila.
“Ami prepara no prontu ona mak bele muda mai iha-ne’e, tanba ami hakarak fatin ne’e dignu,” Crispim akresenta.
Crispim konsidera, vendedór balun difikulta iha fonte finansiál tanba kréditu nune’e presiza tempu atu buka osan hodi sosa materiál kalen, besi, rai-henek no sumente atu konstrui kioske molok muda sasán.
Negosiante produtu lokál, Cristalina de Almeida konsidera kondisaun iha merkadu foun seidauk sufisiente ba negosiante fa’an produtu lokál, tanba la kria kondisaun másimu.
“Ami fa’an produtu lokál hanesan fa’an modo mutin, modo metan, senora no feuk ropa no sasán barak maibé fatin la sufisiente, ne’e atu ba fa’an saida iha ne’ebá,” Cristalina hateten.
Husi observasaun Agência TATOLI iha terrenu nota, negosiante iha merkadu Vila Nova hahu sobu kioske iha merkadu antiga no kontinua transporta materiál hodi konstrui fatin iha merkadu Tuanau.
Alende ne’e, iha merkadu foun Tuanau seidauk iha atividade ekonomia tanba vendedór sira sei kontinua konstrusaun kioske no prepara kondisaun iha fatin referida.
Tuir dadus, tipu negosiu ne’ebé muda ba merkadu Tuanau hamutuk 21, husi totál negosiante 879 kompostu husi obralan 148, ropa loja 125, sapatu 87, nesesidade báziku 146, ekipamentu dapur 54, ekipamentu uma 10, alfaiate 14, sana-rai tolu, tais hitu, telefone 15.
Nune’e mós tesi-fuuk lima, eletróniku sia, kosmétika 13, osan-mean ida, pulsa eletrisidade rua, loja agrikultor ida, farmasia ida, matadoru 10, fa’an ikan 23, produtu lokál 200 no mini restaurante hamutuk hitu.
Jornalista : Natalino Belo
Editór : Evaristo Soares Martins
