Ermera, 21 novembru (TATOLI) – Xefe Suku Katrai Kraik, Carlos da Costa Soares, dehan estrada nafatin sai problema ba komunidade iha área refere atu faan sira-nia produtu iha merkadu.
”Ita boot sira haree katak estrada ne’e nafatin problema ba komunidade sira husi suku to’o ba aldeia sira bainhira sira atu lori sira-nia produtu ba merkadu tenke lao ain foin to’o merkadu hodi faan sira-nia produtu sira”, Carlos da Costa Soares informa ba jornalista sira iha sede Suku Katrai Kraik, ohin.
Nia dehan, projetu balun mak lao hela, hanesan PNDS ne’ebé nia orsamentu mai husi dezenvolvimentu suku mak sira halo estrada uitoan iha suku laran maibé nafatin sai preokupasaun, tanba populasaun barak entaun tinan-tinan suku ne’e rasik nafatin problema ba estrada.
”Entaun ho problema estrada fó impaktu boot ba komunidade sira atu lori sira-nia produtu ba merkadu hanesan modo, koto, fehuk ropa sira, entaun sira la lori ba merkadu hodi faan, atu hetan netik osan ruma hodi sustenta nesesidade uma laran”, nia relata.
Nia afirma, komunidade sira iha suku ne’e, moris ho vida agrikultór no ortikultura hodi haree ba sira-nia oan nia futuru. Tanba ne’e husi parte relevante sira bele tau atensaun ba estrada sira ne’e.
”Suku Katrai Kraik ne’ebé potensiál liu no komunidade moris ho agrikultór no ortikultura, entaun potensiál ne’ebé iha mak kafe, fehuk ropa, koto, modo no seluk tan, entaun ida-ne’e mak komunidade nia produtu lokál iha suku ne’e durante sira iha”, nia afirma.
Suku Katrai Kraik ho totál aldeia sia, uma-kain hamutuk 613 no totál família hamutuk 2.689.
Jornalista : Felicidade Ximenes
Editór : Zezito Silva
