DILI, 21 novembru 2024 (TATOLI)- Konsellu Ministru, kinta ne’e, aprova Projetu Rezolusaun Governu, kona-ba kompromisu Operasionál Konjuntu entre FALINTIL-Forsa Defeza Timor-Leste (F-FDTL) no Polísia Nasionál Timor- Leste (PNTL), hodi garante seguransa, estabilidade sosiál no moris-di’ak populasaun nian, durante Serimónia Ofisiál sira ba komemorasaun Aniversáriu Proklamasaun Independénsia Timor-Leste nian ba dala-49,nune’e mós durante festividade Natál no Tinan Foun nian.
Rezolusaun Governu ne’e aprezenta hosi Ministru Defeza no Interiór, Donaciano do Rosário Gomes no Francisco da Costa Guterres.
“Rezolusaun Governu ne’e estabelese operasaun patrullamentu no vijilánsia iha fatin sensivel sira iha munisípiu hotu-hotu, prevene aktu instabilidade sosiál. Forsa Tarefa ne’e sei koordena husi Xefe Estadu Maior Jenerál Forsa Armada no Komandante Jerál PNTL, ho apoiu husi entidade governamentál no institusionál oioin,” tenik iha nota ne’ebé Agência TATOLI asesu hosi portal Governu.
Rezolusaun ne’e prevee mós medida espesífiku sira, hanesan definisaun husi kadeia sira komandu, regra empeñu sira no apoiu intelijénsia nian, no mós uzu proporsionál husi forsa tuir lejizlasaun atuál.
Períodu operasaun Task Force ida-ne’e sei hahú iha loron 20 novembru tinan 2024 to’o loron 5 janeiru 2025.
Jornalista: Hortencio Sanchez
Editór: Florencio Miranda Ximenes
