DILI, 22 novembru 2024 (TATOL) – Sekretaria Estadu Formasaun Profisionál no Empregu (SEFOPE) hamutuk ho Embaixada Austrália iha Timor-Leste, ohin, halo lansamentu ba Manuál Operasionál ka Operations Manual (OM) atualizadu ne’ebé fó benefísiu ba traballadór sira ne’ebé hakarak atu hola parte iha Eskema Mobilidade Traballadór Pasífiku Austrália (PALM).
Lansamentu ne’e hala’o iha Salaun Suai Timor Plaza ho asinatura husi Sekretáriu Estadu Formasaun Profisionál no Empregu (SEFOPE) Rógeiro de Araújo Mendonça, hamutuk ho Adjuntu Xefe Misaun Embaixada Austrália nian iha Timor-Leste, Edward Wilkinson no hetan partisipasaun direta husi reprezentante diresaun SEFOPE iha nivel munisípiu sira.
Sekretáriu Estadu SEFOPE, Rógeiro de Araújo Mendonça, apresia ba apoiu Austrália nian liuhosi Departamentu Negósiu Estranjeiru no Komérsiu (DFAT) no mós ekipa husi Eskema PALM hodi realiza misaun SEFOPE atu atualiza manuál refere.
“Manuál ne’e atu garante katak rekrutamentu la’o ho di’ak no prevene inkonveniente ne’ebé akontese to’o agora. Entaun id-ne’e hanesan manuál hahú hodi fasilita traballadór sira husi rejistu to’o hetan servisu”, Rógeiro de Araújo, hateten iha TP, ohin.
Nia rekorda, Manuál Operasionál ne’e kria ne’ebé apoiu husi Programa Dezenvolvimentu Forsa Traballu Timor-Leste iha tinan 2017 no 2019, ne’ebé hetan revizaun husi Fasilidade Traballu Pasífiku ka Pacific Labor Facility (PLF) iha tinan 2023 hodi responde ba mudansa sira iha eskema PALM. Revizaun ida-ne’e lidera husi Diresaun Nasionál Empregu iha Rai Liur, ne’ebé finansia husi Governu Austrália liu husi Fasilidade Empregu Pasífiku.
Manuál Operasionál Eskema PALM Timor-Leste fó apoiu ba ekipa Diresaun Empregu Ultramarinu liuhosi SEFOPE hodi fornese servisu ho kualidade aas liu no padronizadu ba traballadór no empregadór Timor-Leste ne’ebé hetan aprovasaun tuir Eskema.
“Buat foun iha manuál ida-ne’e maka programa Reintegrasaun Forsa Traballu Eskema PALM, Família ba PALM no Edukasaun Formasaun Téknika no Profisionál. Ha’u husu ba DNEE atu servisu ho sira ne’ebé iha munisípiu hodi implementa buat hotu ne’ebé iha manuál”, nia dehan.
Adjuntu Xefe Misaun Embaixada Austrália iha Timor Leste Edward Wilkinson, subliña manuál ne’e reprezenta reafirmasaun ba prinsípiu integridade no kompromisu nasaun rua nian atu fó empregu ba sidadaun Timor-Leste.
“Austrália kontente tebes ho timoroan sira ne’ebé servisu ona iha Austrália hodi haforsa empreza lokál sira iha Austrália no hadi’a ekonomia rejionál. Entaun ami sei ajuda hasa’e kapasidade sira no apoia SEFOPE nia ambisaun atu hasa’e númeru empregu, ne’ebé agora daudaun sidadaun timoroan ativu hamutuk 4.000 iha Austrália”, Edward subliña.
Nia apresia ho esforsu hamutuk husi ekipa husi SEFOPE no PALM atu manuál ne’e bele implementa tuir nesesidade, konsidera katak Komisaun Anti-Korrupsaun (KAK) mós hola parte iha prosesu rekrutamentu, espera katak iha futuru manuál bele uza hodi fó impaktu pozitivu.
Jornalista : Felicidade Ximenes
Editór : Zezito Silva
