BAUCAU, 29 novembru 2024 (TATOLI) – Iha komemorasaun Loron Proklamasaun Independénsia ba da-49, Sekretáriu Estadu Komunikasaun Sosiál (SEKomS), Expedito Dias Ximenes, rona preokupasaun komunidade suku Ossoala, postu administrativu Vemasse, munisípiu Baucau.
Sekretáriu Estadu Komunikasaun Sosiál, Expedito Loro Dias Ximenes, hala’o diálogu ho komunidade no autoridade lokál postu administrativu Vemasse hamutuk suku hitu hanesan; Kaikua, Loilubu, Ostiku, Vemasse Tasi, Waigae, Uato-Lari no Ossoala.
Iha diálogu, autoridade lokál sira maioria hato’o difikuldade hanesan; estrada, bee-moos, eletrisidade no rede telekomunikasaun ne’ebé konsideradu halo komunidade sente izolada.
“Autoridade lokál sira husu atu governu konsidera sira-nia preokupasaun no husu atu Governu Sentrál aprova orsamentu tuir planu ka nesesidade ne’ebé sira presiza, liuliu hato’o ona husi postu no autoridade munisipál,” nota imprensa ne’ebé Agência TATOLI asesu husi Gabinete SEKomS, sesta ne’e.
Autoridade lokál sira aprezenta mós problema kona-ba veteranu ne’ebé iha postu Vemasse hanesan iha veteranu balu hetan ona rekoñesimentu no subsídiu maibé ikus hapara tiha fali.
Mujer mós autoridade lokál sira husu atu SEKomS atu organiza formasaun ba foinsa’e sira kona-ba jornalizmu nune’e hatene rekolla informasaun iha suku liga ho edukasaun, saúde, infraestrutura, agrikultura no seluk tan, nune’e bele hetan atensaun husi Governu.
“Estabelese sentru informasaun suku, tanba entre suku hitu ne’e suku Uigae de’it mak iha ona sentru informasaun suku maibé la efetivu,” refere nota imprensa ke’e.
Sekretáriu Estadu Komunikasaun Sosiál, Expedito Loro Dias Ximenes, sei hato’o preokupasaun hirak-ne’e ba ministériu kompetente no halo relatóriu ba Konsellu Ministru nune’e instituisaun relevante sira bele rejista no buka solusaun.
Kona-ba preokupasaun ligada ho Sekretaria Estadu Komunikasaun Sosiál, governante ne’e sei orienta parte tékniku sira rekolla informasaun kle’an molok estabelese sentru informasaun suku, rádiu komunidade no distribuisaun jornal.
Administradora Postu Administrativu Vemasse, Elda Maria Vegas de Sousa Freitas, subliña, inisiativa hala’o serimónia hasa’e bandeira iha loron nasional sei hala’o rotativa husi suku ida ba seluk iha postu Vemasse.
“Tinan ida-ne’e, loron Proklamasaun hala’o iha suku Ossoala, tinan oin sei hala’o fali ho suku seluk,” Elda hateten.
Iha selebrasaun Loron Proklamasaun Independénsia 28 novembru iha Ossoala, Sekretáriu Estadu Komunikasaun Sosiál fahe mós farda no bola-ain ba estudante sira.
Jornalista : Natalino Belo
Editór . : Evaristo Soares Martins
