BAUCAU, 04 dezembru 2024 (TATOLI) – Autoridade Administrasaun Munisipál Baucau, kuarta ne’e, muda negosiante husi Vila Antiga hamutuk 52 ba merkadu foun Tuanau.
Sekretáriu Munisipál Baucau Asuntu Planeamentu Investimentu no Dezenvolvimentu Integradu , Eduardo Filipe Ximenes, esplika, desizaun referida bazea ba akordu entre negosiante ho autoridade ne’ebé deside deste iha fulan-juñu atu hahú prepara no hamamuk merkadu Vila Nova no Antiga nune’e hahú hikas atividade ekonomia iha merkadu Tuanau.
“Bazar iha-ne’e foer ne’ebé sira utiliza soe fali iha bee-dalan afeta ba komunidade sira hela iha kraik, tanba ne’e ita la permite fatin sira hanesan ne’e atu halo negósiu,” Sekretáriu Munisipál Baucau Asuntu Planeamentu Investimentu no Dezenvolvimentu Integradu hateten iha Vila Antiga, kuarta ne’e.
Autoridade Baucau, garante negosiante sira sei hetan espasu iha merkadu foun Tuanau tanba merkadu referida hamutuk ektare ualu, tanba ne’e kada negosiante tenke ba rejistu iha ekipa Jestaun Merkadu hodi hetan lisensa no koloka iha fatin ne’ebé define ona.
Maske kondisaun iha merkadu seidauk sufisiente maibé Autoridade Baucau kompromete sei rezolve fazeadamente hanesan estrada, bee-moos, eletrisidade no fatin sanitasaun.
Negosiante Jacinta Ximenes, lamenta ho desizaun hosi Autoridade tanba iha merkadu foun seidauk iha kondisaun maibé obriga tenke simu barraka.
“Autoridade Munisipiu nia hanoin iha karik kria tiha kondisaun mak muda ami, ami fa’an mak foin han hemu hodi ami-nia oan sira-nia eskola,” Jacinta Ximenes hateten.
Jornalista : Natalino Belo
Editór : Evaristo Soares Martins
