DILI, 04 dezembru 2024 (TATOLI) – Governu liuhusi reuniaun Konsellu Ministru, kuarta ne’e, halo analiza ba aprezentasaun husi Ministru Agrikultura, Pekuária, Peska no Floresta, Marcos da Cruz, kona-ba rezultadu relatóriu auditoria ne’ebé hala’o iha Inspesaun-Jerál Estadu (IGE, sigla-portugés), ne’ebé avalia ona regularidade, legalidade no konformidade kontratu ba subvensaun públika ne’ebé selebra iha tinan 2022 entre Ministériu Agrikultura no Peskas (MAP).
“Iha tempu ne’ebá, ne’ebé daudaun ne’e sai hanesan Ministériu Agrikultura, Pekuária, Peskas no Florestas (MAPPF), no entidades Asosiasaun Kafé Timor (ACT, sigla-Portugés) no Kooperativa Kafé Timor (CCT, Sigla -Portugés), Konsellu Ministru aprova projetu Rezolusaun Governu ne’ebé inkorpora rekomendasaun prinsipál sira kona-ba relatóriu ne’e,” tenik Vise-Ministru Asuntu Parlamentár Aderito Hugo da Costa.
Nia dehan, relatóriu ne’e aprezenta rezultadu análize ba kontratu subvensaun ne’ebé ho objetivu atu halo reabilitasaun no expansaun ba plantasaun kafé, relatóriu sira ne’ebé submete no dadus ba benefisiáriu sira, ne’ebé abranje tinan 2022 no 2023 nian. Deskobre katak laiha kontratu analizadu ida mak implementa iha ninia totalidade, haree ba meta sira ne’ebé estabelese ne’e la kumpre ho kompletu.
Rezolusaun Governu define obrigasaun atu reajusta verbas tuir persentajen ezekusaun kontratu nian, tenke fó filafali restu ne’e ba kofre Estadu.
Rezolusaun Governu determina mós katak Inspesaun-Jerál Estadu realiza averiguasaun adisionál ida hodi avalia regularidade, konformidade no legalidade utilizasaun nian, husi MAP, husi verba totál ne’ebé aloka hanesan subvensaun públika nian, hodi halo atividade reabilitasaun no expansaun kafé, ne’ebé la transfere ba benefisiáriu ruma, maibé uza no jere de’it husi servisu iha Ministériu refere ba atividade apoiu reabilitasaun no expansaun kafé no kafé Laku Ten.
Jornalista: Hortencio Sanchez
Editór: Florencio Miranda Ximenes
