DILI, 05 dezembru 2024 (TATOLI) – Governu liuhusi reuniaun Konsellu Ministru, kuarta ne’e, iha Palásiu Governu Dili aprova indikasaun ba naran sira ne’ebé sei nomeia husi Ministru Transportes no Komunikasaun (MTK), Miguel Marques Gonçalves Manetelu, ba Konsellu Administrasaun Autoridade Nasionál Komunikasaun (ANC, sigla -portugés) nian.
“Nran sira ne’e mak hanesan, Flavio Cardoso Neves sei hetan nomeasaun nu’udar Prezidente Konsellu Administrasaun. Novelino dos Santos no Georgina Emilia da Silva Garcia ida-ida sei asume kargu hanesan Administradór Tékniku no Finanseiru respetivamente. Roberto Manuel da Costa Martins no José Ave Maria Ximenes Cipriano Gonçalves sei hetan nomeasaun nu’udar Administradór Naun-Ezekutivu,” tenik Vise-Ministru Asuntu Parlamentár Aderito Hugo da Costa.
Vizaun no misaun ANC nian
Vizaun
Timor-Leste sei iha rede telekomunikasaun modernu ne’ebé liga ema ba malu no ba mundu; Ema hotu iha Timor-Leste sei iha asesu ba Servisu Internet Banda Larga ne’ebé konfiável, seguru no baratu to’o tinan 2030.
Misaun
Atu estabelese ambiente regulatóriu ne’ebé promove merkadu kompetitivu hodi presta servisu telekomunikasaun ne’ebé modernu, seguru no asesivel hanesan atu apoia realizasaun objetivu dezenvolvimentu nasionál.
Jornlista: Hortencio Sanchez
Editór: Florencio Miranda Ximenes
