DILI, 04 dezembru 2024 (TATOLI) –Primeiru-Ministru (PM), Kay Rala Xanana Gusmão husu Embaixadór Timor-Leste bá Reinu Tailándia, Francisco Cepeda atu hametin kooperasaun bilaterál entre país rua no mós ho membru Organizasaun Rejionál Association of Southeast Asian Nations (ASEAN).
“Husu atu Embaixadór fó atensaun uluk ba servisu ASEAN nian, tanba ita iha hela prosesu adezaun. Buka nafatin oportunidade liu kona-bá kooperasaun ne’ebé iha atu prepara ita-nia rekursu iha prosesu adezaun ne’e,” PM Xanana hateten iha Palásiu Governu Dili, kuarta ne’e.
Durante enkontru, PM Xanana husu mós atu hametin liu-tán Timor-Leste nia kooperasaun bilaterál ne’ebé iha ho Reinu Tailándia, buka esplora oportunidade ne’ebé iha hodi lori dezenvolventu mai Timor-Leste.
Nune’e, Embaixadór Francisco Cepeda hateten, durante enkontru aproveita informa bá Xefe Governu kona-bá preparasaun vizita Estadu no servisu Prezidente Repúblika no Primeiru-Ministru rasik bá Tailándia, hodi hametin liután relasaun ne’ebé Timor-Leste iha.
“Haree mós oinsá Tailándia bele vizita TL hodi haree potensialidade ne’ebé iha atu halo investimentu,” Francisco Cepeda informa.
Alende ne’e, PM Xanana husu atu estabelese kooperasaun ida ho Tailándia iha área haki’ak karau, nune’e bele prodús susu-been hodi fornese bá labarik sira iha eskola liu-hosi programa merenda eskolár.
Jornalista: Hortencio Sanchez
Editor: Florencio Miranda Ximenes
