DILI, 05 dezembru 2024 (TATOLI)– Primeiru-Ministru (PM), Kay Rala Xanana Gusmão, kinta ne’e, iha Palásiu Prezidensiál Dili hasorumalu ho Prezidente Repúblika (PR), José Ramos-Horta, hodi relata progresu servisu Governu nian durante ne’e liuliu preparativu sira kona-ba adezaun ba ASEAN.
“Ha’u hasoru Prezidente Repúblika hodi relata serbisu Governu nian, hato’o mós foin lalais ha’u vizita ofisiál ba Malázia ko’alia kona-ba preparassun ita nian atu tama ba ASEAN iha tinan oin,” PM Xanana hateten.
Nia dehan, bainhira tinan oin Timor-Leste atu adere ona ba ASEAN tenke priense lai roteiru ne’ebé ASEAN fó ho kriteria hamutuk hitu.
“Kriteria hitu ne’e balu ita atinje ona 70%, balu foin 40%, ne’ebé horseik iha Konsellu Ministru husu ba Ministeriu sira atu serbisu hamutuk ho Ministeriu Negósiu Estranjeiru no Kooperasaun atu kompleta kriteria hitu ne’e tinan oin ita bele tama ona ba ASEAN,” Xanana tenik.
Iha sorin seluk ba Agência TATOLI Vise-Ministra Asuntu ASEAN Milena Rangel hateten, kriteria hitu ne’ebé ASEAN fó ba Timor-Leste atu prinse sei finaliza tinan oin.
“Kriteria hitu ne’ebé tau iha roteiru ne’ebé ASEAN fó ba Timor-Leste atu priense mak hanesan, primeiru politika komitimentu, segundu konvenssun tratadu ekonomia legál no seluk tan, terseiru ko’alia kona-ba vistu, kuartu ko’alia koan-ba Timor-Leste nia misaun iha liur, kintu ko’alia kona-ba ajensia implementadór sira, sestu bainhira ita sai membru plenu tenke iha kapasidade finansia ba organizassun nia operasionál, ikus liu kona-ba infrastrutura,” Milena dehan.
Milena dehan tan, “kriteria hitu ne’e ida segundu ne’e mak ita presiza serbisu maka’as hanesan tratadu, ratifika konvenssun asuntu legál sira, ida ne’e mak ita tenke haree ho neneik tanba la’ós buat ida ansi, tanba liga liu ba vinkulativu, ne’ebé ita haree ho neneik, seluk ne’e laiha problema.”
Jornalista: Hortencio Sanchez
Editór: Florencio Miranda Ximenes
