DILI, 12 dezembru 2024 (TATOLI)–Primeiru-Ministru (PM), Kay Rala Xanana Gusmão, kuarta ne’e, halo abertura ba jogu Liga Voleiból Timor-Leste divizaun dahuluk, époka dalimak ba tinan 2024, iha Jináziu Dili.
PM Xanana husu ba emprezáriu timoroan sira atu fó apoiu másimu ba klubu voleiból sira hodi bele dezenvolve di’ak liután talentu joven sira, nune’e bele reprezenta mós Timor-Leste iha eventu internasionál sira.
“Ha’u apela ba emprezáriu sira atu haree no tau-matan ba klubu sira hodi dezenvolve di’ak liután joven sira-nia talentu iha área ida-ne’e,” Xefe Governu hato’o durante diskursu abertura.
Notísia relevante : Atleta 702 rejistadu partisipa iha jogu CPLP
PM fó hanoin ba jogadór sira, maski jogu ne’e ho objetivu atu manán, importante liu maka oinsá jogu ne’e la’o ho disiplina, desportivu no edukativu.
Jogu 10 divizaun Liga Voleiból Timor-Leste époka dalimak tinan 2024, partisipa husi klubu 15, kompostu husi klubu feto hitu no klubu mane ualu.
Ekipa feto husi klubu Joli Tomi mak joga uluk no simu derrota husi AD-SLB ho skore 3-2 no ekipa mane klubu AD-SLB manán klubu K-Link ho skore 3-1.
Klubu voleiból ne’ebé partisipa iha jogu ne’e mak hanesan AD-SLB, ADR-União, Assalam, Joli Tomi, Fitun Lorosae, Zona Mesak, Femenina PNTL, no Ekipa mane mak hanesan, AD-SLB, K-Link, Atone Ambeno, SETUS, Bandido Kualidade, Estrela Joli Tomi, Zone Mesak.
Liga voleiból Timor-Leste divizaun dahuluk, époka dalimak tinan 2024 promove unidade, disiplina, no ambisaun atu lori Timor-Leste ba plataforma internasionál.
Liga ne’e hetan apoiu másimu husi Ministériu Juventude, Desportu, Arte no Kultura (MJDAK) ho totál orsamentu $70.000.
Eventu ne’e partisipa husi Ministru Juventude, Desportu, Arte no Kultura, Nelyo Isaac Sarmento, autoridade sira husi Federasaun Voleiból Timor-Leste (FVTL) inklui jogadór sira.
Jornalista : Osória Marques
Editora : Julia Chatarina