Estudante finalista 506 husi ESG Tirilolo pasa ezame nasionál
BAUCAU, 16 dezembru 2024 (TATOLI) – Estudante finalista husi Eskola Sekundária Jerál (ESG, sigla portugés) Tirilolo hamutuk na’in-506 pasa iha ezame nasionál.
Diretór ESG Tirilolo, Estevão Ximenes Gusmão, esplika, estudante terseiru-anu ne’ebé tuir loloos partisipa iha ezame nasionál hamutuk 509, maibé estudante na’in-rua retira tanba kondisaun pesoál no na’in-ida lakon vida tanba kestaun saúde.
“Ha’u sente kontente, tanba eskola públiku ho kuantidade alunu barak. Maibé ami bele kompete ho eskola privadu tanba ami tama mellor 10 iha nasionál,” Diretór ESG Tirilolo hateten iha Vila Nova, segunda ne’e.
Rezultadu ezame nasionál ne’ebé fo-sai, hatudu estudante finalista hamutuk na’in-10 mak sai mellor klasifikadu kompostu hosi Siénsia Teknolojia (CT, sigla portugés) na’in-lima ho valór 56 no lima seluk husi estudante departamentu Siénsia Sosiál no Umanidade (CSH, sigla portugés) ho valór 52.
Husi estudante hirak-ne’e, na’in-tolu iha valór ezame 56 nune’e liu trajetu ne’ebé parte Ministériu Edukasaun fó-sai ho kategória CT másimu valór 54 no CSH valór másimu 52.
Estevão orgullu ho rezultadu ezame nasionál tinan 2024 tanba durante períodu preparasaun hasoru dezafiu sira hanesan menus profesór, maibé ho esforsu eskola referida okupa mellór iha nasionál no pasa 100%.
Estudante mellor klasifikadu, Raimundo A. Aparício ne’ebé hetan valór 56 finalista hato’o agradese no orgullu ho rezultadu ezame nasionál ne’ebé ohin fó-sai ona hosi dirijente eskola.
“Depende ba ita-nia esforsu husi nonu-anu to’o désimu segundu-anu, tenke badinas eskola no esforsu estudu,” Raimundo komenta.
Munisípiu Baucau iha tinan-ne’e hamutuk estudante 5.542 mak partisipa iha ezame nasionál kompostu hosi Eskola Báziku Sentrál (EBC, sigla portugés) na’in-2.865 husi eskola 41, sekundária jerál hamutuk estudante 2.473 husi eskola 22, tékniku vokasionál hamutuk 204 hosi eskola lima.
Jornalista : Natalino Belo
Editór. : Evaristo Soares Martins
