DILI, 16 dezembru 2024 (TATOLI) – Ministru Administrasaun Estatal (MAE), Tomás do Rosário Cabral, hateten Governu iha kompromisu atu harii morru ba iha esplanada Tasi-tolu, tanba fatin istóriku ba Timor-Leste.
“Ida ne’ebá ita sei halo morru hotu, depois mak Vatikanu deside ba Santuariu ka saida? Ami sei prepara hela vídeo sira ne’ebé ita sira kapta ne’e tau iha filme dokumentáriu ida hodi haruka ba Vatikanu. Governu iha komitmentu tomak hodi hadi’a fatin ne’ebá sai Sentru istóriku ba ita hotu.
Governante ne’e esplika fatin ne’ebá sai sentru istóriku la’ós tanba vizita Papa Francisco de’it, maibé iha mós vizita João Paulo II no restaurasaun independénsia Timor-Leste nian.
“Ita-nia restaurasaun independénsia mós ita halo iha ne’ebá, ai-rin bandeira nian kontinua iha ne’ebá. Ita husu autoridade munisipal Dili atu halo jestaun (limpeza),” nia dehan.
“Fatin ne’ebé amu Papá uza, ita sei halo serku-metin desizaun atu Santuariu ka saida ne’e Vatikanu nian” Governante ne’e garante.
Ministru dehan, MAE entrega ona ba iha Ajénsia Dezenvolvimentu Nasionál no Ministériu Planeamentu no Investimentu Estratéjiku hodi halo morru.
Tomás do Rosário Cabral hateten, Polísia Nasionál Timor-Leste no Falintil-Forsa Defesa Timor-Leste sei mantein ne’ebá hodi halo seguransa, tanba seidauk iha morru protesaun.
“Sakristia haat iha kotuk, sasan sei iha laran. Sira lá fó lisensa ba sarani sira halo peregrinasaun, tanba ema dada sai arbiru fiu, la uza fatin soe lixu,” nia lamenta.
Governante ne’e hakarak “moru Protesaun tenki remata no entrega ba iha munisípiu Dili oinsá jere no tau ema pendente iha ne’ebá atu hamoos no oinsá sarani sira uza.
Tuir, ministru fatin Tasi-tolu sai santuariu ema labele lori sasan ba laran. Governu sei tau iha tasi-ibun nu’udar rai Estadu no loke restaurante ruma atu labele lori sasan tama ba laran.
Nia garante katak Igreja halo atividade iha ne’ebá no Governu iha obrigasaun atu halo manutensaun. Se igreja deside sai santuariu, sei iha rendimentu.
“Se Ita bolu dehan santuariu ema Indonézia sei mai vizita barak liu. Se igreja deside sai santuariu sei iha rendimentu. Ita kobra uitoan atu halo manutensaun,” governante ne’e dehan.
Jornaslista: Jesuína Xavier
Editór: Cancio Ximenes
