DILI, 16 dezembru 2024 (TATOLI) — Servisu Rejistu no Verifikasaun Emprezariál, Institutu Públiku (SERVE, I.P), halo lansamentu ba ofisiál ba RegiNet ka sistema rejistu baze dadus emprezáriu sira-nian iha Timor-Leste (TL).
“Ami sente orgullu hodi aprezenta inisiativa inovadora ida ne’ebé transforma tebes oinsá SERVE.I.P atu jere nia prosesu rejistu no dadus emprezáriu nian iha Timor Leste”, Diretór Ezekutivu SERVE,I.P Fausto Dias informa bainhira halo diskursu iha edifísiu SERVE,I.P Matadouru, ohin.
Dias informa, iha tinan barak nia laran SERVE,I.P enfrenta dezafiu boot kona-ba baze dadus, uza deít métodu manuál, hodi limite tebes SERVE,I.P nia kapasidade atu servi empregadór sira no negosiante sira ho forma efisiente no transparante.
“Ho apoiu jenerozu husi Governu Austrália liuhusi programa prosivu ami bele rezolve no ohin loron ita bele halo lansamentu RegiNet sistema rejistu baze dadus husi empreza sira ne’ebé rejistu iha Timor-Leste”, nia hateten.
Nia haktuir, RegiNet laos de’it ferramenta dijitál ida, maibé sistema ne’e mós sai hanesan símbolu SERVE,I.P nia kompromisiu atu moderniza no simplifika servisu públiku nian.
“Sistema eletróniku ida-ne’e permite SERVE,I.P atu iha dadus sentralizadu no fasilita funisonáriu sira halo konsulta banhira emprezáriu sira presiza asesu ba sira-nia dokumentu arkivu no fornese atualizasaun iha tempu reál ba kliente sira inklui empregadór sira, reguladór sira iha ministériu setoriál no ajénsia sira hodi haforsa ami-nia kapsidade atu promove no dezenvolve setór privadu iha nasaun ida-ne’e”, nia subliña.
Iha fatin hanesan, Reprezentante Embaixadór Austrália iha Timor-Leste, Chad Clark, hateten insiativa ida -ne’e atu apoia SERVE.IP nia servisu baze dadus husi emprezáriu sira iha TL.
“Inisiativa sira ne’e iha prosesu ne’ebé mak fornese ona asesoria apoiu ba levantamentu sistema baze dadus ba emprezáriu, ida-ne’e sei hadi’a ambiente ne’ebé permite website dedikadu ida ba rejistu negósiu nian”, nia dehan.
Lansamentu ba sistema rejistu baze dadus husi emprezáriu sira-nian partisipa husi Reprezentante Embaixadór Brunei iha Timor-Leste, reprezentante Embaixada Portugal iha Dili, reprezentante Embaixada Malázia iha Timor-Leste inklui entidade hotu no mós funsionáriu husi SERVE,I.P nian.
Jornalista : Felicidade Ximenes
Editór : Zezito Silva
