DILI, 19 dezembru 2024 (TATOLI)—Governu Liuhusi Ministériu Asuntu Kombatente Libertasaun Nasionál (MAKLN) sei komemora loron nasionál ba eroi no mártir sira iha loron 31 dezembru ho tema ‘Ami-nia mate sai inspirasaun ba povu Timor-Leste.’
“Objetivu husi tema ne’e hodi refeleta ba eroi no martir sira-nia mate, hahú husi tinan 1975 to’o 1999 hodi hakilar nafatin aluta kontinua to’o ita hetan ukun rasik-an,” Ministru Asuntu Kombatente Libertasaun Nasionál, Gil da Costa Monteiro ‘Oan Soru’, hateten, iha salaun MAKLN, Comoro, kinta ne’e.
Aleinde ne’e, Governu hakarak foti tema ne’e tanba haree ba maluk timoroan, liu-liu líder sira ne’ebé inspira no motiva ema hotu momentu situasaun difísil atu luta ba ukun rasik-an ne’e tanba sira mak ko’alia polítika ukun rasik-an.
“Ita hotu hatene, ita-nia eroi sira monu tuituir dalan, sai ona sadik ida ba timoroan hotu, liu-liu sira ne’ebé momentu ne’ebá kaer ho liman no haree ho matan, to’o ita sai nasaun RDTL, signifika mehi ne’e sai realidade. Tanba ne’e mak alienate tema ne’ebé ita foti iha mós liafuan balun ita tau pás no fraternidade tanba husi ida-ne’e mak ita sira moris agora atu komunga liafuan sira ne’e hodi promove pás fraterna umanu no dezenvolvimentu,” nia akresenta.
Notísia relevante : Loron juventude nasionál atu valoriza martir no eroi joven sira
Governante ne’e konsidera, dezenvolvimentu atu la’o tenke iha pás no unidade.
Komemorasaun loron istóriku ne’e iha fatin hotu no konseitu prinsipál mak sei halo reflesaun iha munisípiu sira hotu inklui Rejiaun Administrativa Espesiál Oé-cusse Ambeno (RAEOA).
Atividade ne’ebé sei hala’o mak misa iha loron 30 dezembru iha Parókia Metinaro hotu sei ba tau ai-funan ba Jardim dos Herois Metinaro no iha loron 31 dezembru sei iha serimónia ofisiál komemorasaun loron nasionál eroi iha Rotunda Saudozu Nicolau Lobato, Comoro.
“Ita hotu hatene, kada tinan eventu ne’e sempre akontese iha ne’ebá nune’e husu ba timoroan hotu to’o loron fó minutu ida hakmatek iha loron 31 dezembru bainhira ita ko’alia kona-ba loron nasionál eroi Timor-Leste, tanba sira-nia mate mak ita hetan independénsia,” Oan soru hato’o.
Nia dehan, eroi no mártir sira-nia mate mak ohin loron jerasaun foun goza, nune’e iha komemorasaun ne’e tenke fó omenajen tanba mensajen balun ne’ebé to’o agora sempre dehan sira ne’ebé mate hakilar prontu ba mate importante mak Timor ukun-an.
Iha biban ne’e, governante ne’e hato’o felisitasaun ba timoroan sira hotu, liu-liu ba veteranu sira-nia saúde di’ak nafatin hodi simu Natál no tinan foun ne’ebé mai nakonu ho domin no ksolok.
“Husu ba veteranu iha Timor laran tomak katak hato’o ba família no oan sira ne’ebé sei pasa férias hamutuk ho ita selebra loron-boot ida-ne’e nafatin mantein estabilidade pás no hakmantek hodi simu tinan foun ho haksolok estabilidade di’ak nasaun bele hakmatek no Estadu bele halo dezenvolvimentu ho di’ak,” nia hameno.
Jornalista : Arminda Fonseca
Editora : Julia Chatarina
