Karreta ofisiál F-FDTL hetan tuda iha Bercoli
BAUCAU, 26 dezembru 2024 (TATOLI) – Karreta ofisiál husi FALINTIL-FDTL, Komponente Naval hetan tuda husi joven balun iha área Bercoli, postu administrativu Venilale, munisípiu Baucau.
Kazu referida akontese iha loron-segunda, 23 dezembru purvolta oras 19:00 kalan bainhira vítima ho naran ofisiál F-FDTL Komponente Naval, Majór Júlio Pinto hamutuk ho família kompostu husi nia espoza no oan na’in-ida halo viajen husi Dili ba Viqueque hetan tuda iha área Bercoli, postu Venilale.
“Sira atu viajen ba Uatolari, Viqueque mak hetan tuda iha Bercoli,” Komandante Polísia Nasionál Timor-Leste (PNTL) munisípiu Baucau, Superintendente Xefe António Maria de Sá hateten iha Vila Nova, kinta ne’e.
Kazu referida rezulta karreta vítima ho marka Prado hetan estragu iha área vidru odamatan parte liman karuk no oan hetan kanek kmaan.
PNTL Baucau rasik hafoin simu informasaun direitamente orienta kedas forsa konjunta hamutuk ho eskuadra Venilale halo kedas identifikasaun no konsege kaptura autór prinsipál na’in-ida inklui halo investigasaun ba autór na’in-rua seluk.
“Autór na’in-tolu mak ita konsege kaptura, autór prinsipál na’in-ida no na’in-rua seluk deskonfia grupu hosi autór prinsipál,” De Sá akresenta.
Autór prinsipál ba kazu referida ho inisiál NM idade 16 nu’udar estudante ne’ebé deskonfia kondisaun lanu no atuál prosesa ona iha eskuadra Venilale no hein prezensa vítima hodi kontinua prosesu ba Ministériu Públiku (MP).
Enkuantu situasaun jerál iha munisípiu Baucau PNTL la rejista kazu konflitu tantu insidente no asidente ruma durante selebrasaun loron Natal.
Jornalista : Natalino Belo
Editór. : Evaristo Soares Martins
