DILI, 03 janeiru 2025 (TATOLI) – Ministru Obra Públika (MOP), Samuel Marçal, hateten, ekipa MOP halo levantamentu ba estragus infraestrura sira hodi bele hadi’a.
“Iha fatin barak hanesan iha Soibada, Kribas ne’ebé estrada kotu ho dezastre naturál. Ita-nia problema mak iha Timor-Leste 60% rai-halai, rai-isin no dodok bainhira udan uitoan estrada sira kotu; buat ida-ne’ebé ita labele sees husi ne’ebá,” ministru dehan ba jornalista sira iha Fomentu II, bainhira observa mota Comoro ne’ebé estraga populasaun nia uma no muda sai.
Membru governu ne’e esplika, dalan Soibada nian buka alternativa no halo dalan ona atu komunidade bele liuhusi ne’ebá.
“No ponte sira ne’ebé kotu ita buka atu hadiya. Temporariamente ita atua situasaun sira ne’e. Ha’u simu ona informasaun, haruka ona ekipa ida hodi haree, foti dadus. Se iha alternativa atu halo no hadi’a atu sira bele liu, tanba udan ita labele halo bu’at barak. Ita anota bu’at sira ne’e atu hadi’a,” nia dehan.
Governante ne’e mós relata Ainaro nian mós sira informa ba katak estrada kotu. Mundansa klimatika hamosu dezastre naturál ne’ebé akontese iha fatin hotu-hotu, la’ós iha Timor de’it, maibé iha mundu tomak.
Tuir ministru, iha parte Hera Navál nian mós hetan estragu uitoan, uma hamutuk 69 mak bee tama.
Ministru hateten Governu aloka iha tinan ne’e orsamentu hamutuk millaun $20 hodi responde ba iha situasaun emerjénsia ba infraestrura.
Jornalista: Jesuína Xavier
Editór: Rafael Ximenes de A. Belo
