DILI, 06 janeiru 2025 (TATOLI) – Sekretaria Estadu Formasaun Profisionál no Empregu (SEFOPE), ohin, asina akordu ho joven 11, atu hola parte iha Formasaun Estájiária Téknika (TIT) programa iha Japaun.
Diretór Nasionál Traballadór Estranjeiru SEFOPE, João Correia, esplika katak partisipante TIT 11 sei hahú aranka ba Japaun no sei distribui ba empreza rua ne’ebé diferente, hanesan Tsuneishi Ship Building – Fukuyama Hiroshima (ema na’in 10) no Tsukuba Kooperativa Apoiu Industriál (TISC) – Ibaraki (ema ida).
“Ha’u hein no husu ba imi atu hatudu atitude ne’ebé di’ak atu nune’e empreza sira bele fiar aan hodi fó oportunidade ba juventude timoroan sira seluk”, João Correia dehan iha Sentru Formasaun Becora SENAI, ohin.
Correia hateten, partisipante TIT hirak ne’e liu ona husi teste direta husi kompañia kontraente no partisipa susesu iha formasaun lian Japaun iha SENAI Bocora liuhusi formasaun intensiva husi voluntáriu Japaun hanesan JICA (Japan International Cooperation Agency).
Iha fatin hanesan, Diretór Ezekutivu Konstrusaun Ró Tsuneishi iha Timor-Leste, Koki Oda husu ba partisipante sira atu prepara aan didiak liután hodi adapta ba kondisaun tempu iha Japaun.
“Imi sei bá Hiroshima no iha neve iha ne’ebá no ha’u husu ba imi atu kuidadu imi-nia aan no koko atu uza lian Japaun ne’ebé imi aprende ona ho di’ak”, Koki Oda afirma.
Reprezentante Embaixada Japaun iha Timor-Leste, Yuki Sakai, iha biban ne’e mós agradese ba SEFOPE hamutuk ho voluntáriu JICA sira ne’ebé organiza hodi haruka partisipante TIT ba Japaun bele realiza.
“Ha’u fiar imi iha esperansa barak atu servisu no aprende buat foun nune’e imi bele kontribui ba nasaun ho buat ne’ebé imi estuda ona. Hau hein katak família sira iha ne’e sei tau matan ba imi nia oan sira, tanba ne’e lalika hanoin demais, imi sei kontinua halo komunikasaun ho sira”, Yuki Sakai relata.
Diretór Jerál SEFOPE, Carlito do Rosario Cabral, agradese ba kompañia rua ne’e tanba bele oferese ona programa TIT ba juventude Timor-Leste 11 ho kontratu tinan tolu.
“Entaun ba maluk sira hotu atu prepara aan didi’ak tanba oras servisu iha ne’ebá rigorozu tebes, ema ida-idak diferente, kultura no atitude. Kontratu atuál tinan tolu no karik iha atitude ne’ebé di’ak sei prolonga tan”, Carlito do Rosario Cabral konklui.
Jornalista : Felicidade Ximenes
Editór : Zezito Silva
