BAUCAU, 07 janeiru 2025 (TATOLI) – Autoridade suku Loilubo, postu administrativu Vemasse, munisípiu Baucau, finaliza ona projetu tolu husi tinan 2022 to’o 2024.
Projetu tinan-tolu referida kompostu husi atividade Reabilitasaun Sede Suku (RSS) tinan 2022, moru protesaun sentru saúde tinan 2023 no konstrusaun mini merkadu ba tinan 2024 nian ne’ebé inaguradu husi Prezidente Autoridade Munisipál (PAM) Baucau.
Projetu ne’ebé implementa husi PNDS no finansia husi Ministériu Administrasaun Estatál (MAE) ho totál rihun 90-resin ne’ebé fahe ba RSS rihun 12-resin, moru protesaun sentru saúde hamutuk rihun 39-resin no konstrusaun mini merkadu hamutuk rihun 32-resin.
“Sentru saúde bele asegura animal sira labele tama, sede suku bele garantia ona atendimentu administrasaun ba inan aman sira, enkuantu mini merkadu ami sei haree inan-aman sira-ne’ebé fa’an iha dalan-ninin ba fa’an iha merkadu,” Xefe suku Loilubu Joanico da Costa Freitas hateten iha Loilubu, tersa ne’e.
Projetu tolu referida kuaze hetan apoia husi emprezáriu lokál no veteranu suku Loilobu tanba durante implementasaun hasoru difikuldade menus orsamentu nune’e apoia materiál ne’ebé fó hanesan keramik, tripleks, rai-henek, batako, sumentu, fatuk no besi.
“Projetu tolu referida hetan mós apoiu husi parte kompañia lokál no veteranu Loilobu oan sira, tanba hakarak kontribui dezenvolvimentu ba suku,” Joanico Freitas esplika.
Xefe suku sei kontrola fasilidade hirak-ne’e tanba konsidera mai husi orsamentu osan povu nian no sei fó prioridade ba atividde tinan 2025 hanesan foka ba problema seluk ne’ebé komunidade presiza.
Prezidente Autiridade Munisípiu Baucau, Veneranda Lemos, hateten, Governu liuhusi autoridade munisípiu entrega ona ba komunidade iha suku Loilobu liuliu responde komunidade nian preokupasaun ba infraestrutura bázika mezmu ho fazeadamente.
“Sede Suku ne’e sei presta servisu ba komunidade tomak. Saida mak esforsu Governu nian atu halo oituan oituan, maibé beibeik,” Veneranda hateten.
Veneranda agradese no orgullu ho kontribuisaun veternau inklui kompañia lokál, tanba iha konsiénsia serbisu ho autoridade lokál hodi kontribui dezenvolvimentu iha nível suku.
Jornalista : Natalino Belo
Editór. : Evaristo Soares Martins