OÉ-CUSSE, 09 Janeiru 2025 (TATOLI) – Diresaun Rejionál Konservatóriu, Servisu Rejistu Sivíl no Notariadu, Rejiaun Administrativa Espesiál Oé-Cusse Ambeno (RAEOA) hahú ohin halo ona atendimentu pasaporte ba sidadaun sira.
“Tinan kotuk suspende, hahú ohin ba oin ami atende fali, maibé ita fó limitasaun. Bazeia ba oráriu ne’ebé fó husi nasionál katak loron ida ami atende de’it ema na’in-20, ne’ebé atendimentu ne’e la’ós diariamente, maibé semanál. Kada semana fó atendimentu iha loron segunda”, Diretór Konservatóriu Servisu Rejistu Sivíl no Notariadu Oé-Cusse, Rui Perreira Sequeira, hateten iha Oé-Cusse, ohin.
Nia fó-sai kritéria atu renova pasaporte presiza aneksa ho pasaporte tuan, billete identidade no sertidaun moris, atu trata pasaporte foun presiza mak sertidaun RDTL, billete identidade no sertidaun moris orijinál.
“Selu taxa ne’e hahú husi $50 ba durasaun semana rua, $75 loron tolu no $100 loron ida. Foti direita iha nasionál, karik iha família ruma bele bá foti iha edifísiu no aprezenta resibu banku nian, karik laiha família atu foti iha Dili, husi diresaun mak sei bá foti no aplikante sira foti de’it iha Oé-Cusse”, nia dehan.
Dirijente ne’e rekoñese katak durante halo atendimentu mosu falla ho sistema tanba tempu udan afeta ba liña internét. “Dalaruma aplikante hasai ona foto, pasaporte manda ba server nasionál la akapta maske balun selu ona, maibé ami nafatin esforsu to’o hetan solusaun”, nia garante.
Iha fatin hanesan, xefe suku Lalisuk, iha sub-rejiaun Pante Makasar, Hermenegildo Lalisuk, agradese tanba ohin bele hahú halo atendimentu pasaporte ba sidadaun, tanba tinan kotuk suspende.
“Durante ne’e afeta tebes ba ita-nia estudante no sidadaun barak. Bainhira atu viajen bá rai-li’ur, maibé pasaporte kaduka no balun seidauk iha, entaun ita husu fó atendimentu ho dignu ba ita-nia maluk sira-ne’ebé presiza tanba ne’e importante”, nia realsa
Notísia relevante: Notariadu Oé-Cusse rekolla $16,300 hosi atendimentu pasaporte eletróniku
Jornalista: Abílio Elo Nini
Editora: Maria Auxiliadora
