BAUCAU, 10 janeiru 2025 (TATOLI) – Estrada rurál hamutuk pakote neen ho totál kilómetru 12,5 hahú iha faze reabilitasaun ho durasaun tinan-ida.
Diretór Obra Públika Munisípiu Baucau, Agostinho Ximenes, esplika, husi pakote hirak-ne’e sei implementa iha suku Buibau ho diresaun Samalari, postu administrativu Baucau Vila hamutuk pakote lima no suku Sagadate, postu administrativu Laga ho totál kilómetru ida.
“Kompañia sira prepara ona, balun komesa lori ekipamentu pezadu sira atu hahú serbisu, tanba orsamentu iha ona,” Diretór Obra Públika Baucau hateten iha Vila Nova, kinta ne’e.
Kompañia sira selebra kontratu iha loron -5 Novembru 2024 ho durasaun serbisu tinan-ida, hahú iha loron-15 novembru 2024 to’o novembru tinan-ne’e.
Husii pakote neen referida kompostu pakote ida to’o lima ho totál kilómetru 10.5 hanesan pakote dahuluk distánsia km 0+000-2+000 responsabiliza husi kompañia NENOVN5 Unip.Lda ho total orsamentu $409,205.00, pakote daruak km 2+000-4+000 responsabiliza husi kompañia LOVERBALEGA Unipessoal.Lda ho valór orsamentu $407,603.39.
Pakote datoluk km 4+000-6+000 responsabiliza husi MEXA Unipessoal.Lda ho orsamentu US$ 447,615.29, pakote dahaat km 6+000-8+000 responsável husi ALEFRANS XIMENES Unipessoal.Lda ho valór orsamentu $465,028.05 no pakote dalima km 8+000-10+500 responsabiliza husi ZILU VIFRE Unip.Lda ho valór orsamentu $505,645.60.
Enkuantu pakote rua seluk ne’ebé implementa iha suku Sagadate ho diresaun husi Sirebu’u-Abuti km 2+000-4+000 reabilita husi kompañia SICOLA Unip.Lda ho valór kontratu $448,714.07.
“Ida-ne’e sei fó benefísiu ba ita-nia populasaun no komunidade, liuliu área agrikultura ne’e,” Agostinho akresenta.
Agostinho Ximenes, argumenta bainhira estrada rurál finaliza, bele responde ona preokupasaun komunidade nian, tanba bele fasilita agrikultór sira transporta produtu lokál ba merkadu.
Tuir akordu iha kontratu, totál kilómetru 12.5 referida parte kompañia sira sei serbisu ho tipu reabilitasaun liuhusi mekanismu makadam hanesan parte xuvida reabilita ho maneira plan (cor).
Jornalista : Natalino Belo
Editór : Evaristo Soares Martins