BAUCAU, 20 janeiru 2025 (TATOLI)—Sekretariadu Tékniku Administrasaun Eleitorál (STAE) Munisípiu Baucau, prepadadu realiza eleisaun suku foun iha finde semana ne’e, 25 janeiru.
Diretór STAE Baucau, Natividade Freitas Guterres, esplika preparasaun ba eventu ne’e finalizadu ona no tuir planu aban (21/01/2025) sei distribui materiál sensitivu no la’ós sensitivu hosi Dili mai Baucau no sei kontinua halo pakotementu iha loron-kuarta antes distribui ba sentru votasaun sira.
“Preparasaun tékniku, formasaun no buletin votu finaliza hotu ona inklui kandidatura sira mós rejistadu ona. Ne’ebé, aban, sei tula materiál sira-ne’e hosi Dili mai Baucau,” Natividade ba TATOLI iha nia kna’ar fatin, Baucau Vila Nova, segunda ne’e.
Nia apela ba eleitór sira atu iha loron eleisaun tenke ezerse direitu hodi hili líder suku tanba kriasaun suku foun bazeia ba pedidu hosi komunidade.
STAE Baucau, nia haktuir, prepara ona Pesoál STAE Apoiu Suku (PSAS) no Pesoál STAE Apoia Aldeia (PSAA) no tuir planu iha loron-kuarta sei realiza formasaun ba membru meza asembleia aldeia.
Entretantu, suku foun referidu kompostu husi suku Builai no Caibada Makasa’e lokalizadu iha postu administrativu Baucau Vila, enkuantu suku Ueru-Mata pertense ba postu administrativu Laga.
Notísia relevante: Preparasaun eleisaun suku iha Baucau atinje 75%
Suku Builai iha aldeia haat mak hanesan Builai, Alala, Manulao no Samalaculiba. Caibada Makasa’e iha aldeia haat kompostu hosi Boru-baha, Caiobilale, Data-ua no Maulame no suku Ueru-Mata aldeia iha ida mak aldeia Ueru-Mata.
Eleisaun suku foun iha Baucau ne’e sei envolve eleitór hamutuk 3.500 resin kompostu husi suku Builai eleitór 1.600 resin, Caibada Makasa’e 1.600 resin no Ueru-Mata hamutuk eleitór na’in 300 resin.
Kandidatura xefe suku hosi suku tolu ne’ebé mensionadu hamutuk na’in sia kompostu mane na’in ualu, feto ida. Suku Builai kandidatu na’in tolu, Caibada Makasa’e na’in tolu (mane rua no feto ida), enkuantu suku Ueru-Mata iha kandidatu na’in ida.
STAE Baucau halo ona planu kalendáriu ba prosesu sira hanesan loron-kuarta to’o kinta sei halo pakotementu, sesta kontinua distribui ba sentru votasaun sira antes realiza eleisaun iha loron-sábadu, 25 janeiru.
Suku foun tolu ne’e estabelese hosi VIII Governu Konstitusionál ne’ebé lidera hosi Jenerál Taur Matan Ruak no nia estabelesementu bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu. Nune’e, iha munisípiu Baucau totál suku akrese ona ba 62 hosi postu administrativu ualu mak hanesan postu administrativu Baucau Vila, Vemasse, Venilale, Laga, Baguia, Quelicai, Matebian no Quelicai Antiga.
Jornalista: Natalino Belo
Editór: Xisto Freitas da Piedade