BAUCAU, 20 janeiru 2025 (TATOLI)—Komandu Jerál Polísia Nasionál Timor-Leste (PNTL) deside Superintendente João Sancho Pires substitui Superintendente Xefe António Maria de Sá hodi lidera interinamente Komandu PNTL Munisípiu Baucau.
Komandante PNTL Munisípiu Baucau Sesante, Superintendente Xefe António Maria de Sá, esplika katak nia parte obedese ba desizaun referida no husu membru iha Baucau atu koopera ho komandante foun liuliu superiór no komunidade.
“Ha’u enkoraja nafatin komandante sira hotu no husu atu kontinua nafatin serbisu hamutuk no depózita konfiansa ba malu, halo relasaun metin malu nafatin,” António de Sá dehan liuhusi ninia deskursu iha Vila Nova, Baucau Vila, segunda ne’e.
Nia argumenta katak maski Komandante PNTL Baucau mak foun maibé pesoalmente atúal Komandante referidu la’ós ema foun iha instituisaun PNTL tanba antes ne’e hala’o kna’ar nu’udár Segundu Komandante Polísia Munisípiu Dili.
António de Sá orgullu durante fulan tolu lidera polísia Baucau hasoru eventu no selebrasaun loron nasionál hanesan finadu, selebrasaun 28 Novembru to’o natál inklui troka tinan situasaun hotu la’o hakmatek iha Baucau.
Nia hato’o agradesementu ba Komandante Seksaun, Eskuadra, Autoridade, Veteranu inklui komunidade tomak tanba durante mandatu koopera no serbisu hamutuk hodi kria pás no estabilidade iha Baucau.
Entretantu, Atúal Komandante PNTL Baucau, Superintendente João Sancho Pires, kompromete sei kontinua programa komandante sesante hodi asegura pás no estabilidade inklui bá oin sei estabelese planu ligadu ho serbisu Autoridade Administrasaun Baucau.
“Ita sei vizita entidade sira iha Baucau, Autoridade, Igreja no Eskuadra atubele ko’alia ho sira,” Superintendente João Pires informa.
Pires hato’o ba komandante eskuadra sira atu koopera no husu veteranu inklui komunidade tomak atu serbisu hamutuk hodi kria pás no estabilidade iha Baucau.
Desizaun ba substituisaun kargu Komandante PNTL Baucau bazeia ba despaxu Komandu Jerál PNTL númeru: 169/CG/PNTL/I/2025, loron 11 janeiru, kona-ba nomeasaun Komandante PNTL Interinu Munisípiu Baucau.
Antes ne’e, Superintendente João Sancho Pires asumi kargu nu’udár Segundu Komandante Polísia Munisípiu Dili dezde tinan 2023 to’o promovidu ba Komandante Polísia Munisípiu Baucau interinu.
Enkuantu, iha tersa (05/11/2024), Superintendente Xefe António Maria de Sá simu pose hosi Komandante Jerál PNTL, Komisáriu Jerál Polísia Henrique da Costa ba Komandante PNTL Munisípiu Baucau, liuhusi despaxu Gabinete Komandante Jerál ho Nu.550/CG-PNTL/X/2024.
Jornalista: Natalino Belo
Editór: Xisto Freitas da Piedade