Edifísiu foun Serbisu Edukasaun Munisipál Baucau inauguradu
BAUCAU, 24 janeiru 2025 (TATOLI)—Diretór Serbisu Edukasaun Munisipál Baucau, Afonso dos Santos da Costa, konsidera katak ho inaugurasaun edifísiu foun Serbisu Edukasaun Munisipál Baucau bele ona fasilita serbisu atendimentu edukasaun.
Afonso espresa nia sentimentu haksolok relasiona ho inaugurasaun ba edifísiu referidu ne’ebé kompañia responsável finaliza iha findu tinan 2024 liubá.
“Fatin furak tebes. Tan ne’e, agradese ba Governu tanba fasilita ona ami,” Diretór Serbisu Edukasaun Munisipál Baucau hateten iha edifísiu foun referidu, Vila Nova, Baucau, sesta ne’e.
Edifísiu ne’ebé konstrui iha tinan 2023 ne’e fundu mai husi Autoridade Administrasaun Munisipál Baucau liuhusi Programa Dezenvolvimentu Integradu Munisipál (PDIM).
Edifísiu foun ne’e sei utiliza ba serbisu departamentu rua kompostu husi Ensinu Báziku no Ensinu Sekundáriu inklui Inspesaun ho totál funsionáriu hamutuk 47, nia medida obra 10x20m² no sei koloka seksaun inklui divizaun sira ho kedas fasilidade hanesan moru hale’u no ekipamentu sira.
Kontratu ba projetu konstrusaun edifísiu Serbisu Edukasaun Munisipál Baucau realizadu iha fulan-marsu 2023, ho durasaun serbisu tinan ida no totál orsamentu ne’ebé gasta hamutuk $448.942,51. Kompañia Caidaralata mak sai manán-na’in ba obra ne’e.
Entretantu, edifísiu ne’e inaugura husi Ministru Administrasaun Estatál (MAE), Tomás do Rosário Cabral no partisipa husi Ministru Justisa, Sergio Hornai no Prezidente Autoridade Munisipál Baucau, Veneranda Lemos Martins.
Jornalista: Natalino Belo
Editór: Xisto Freitas da Piedade
