DILI, 25 janeiru 2025 (TATOLI)—Diretór Sekretariadu Tékniku Administrasaun Eleitorál (STAE) Manatuto, Mariano Natalino Soares da Silva, hateten suku rua iha Munisípiu Manatuto hanesan suku Iliheu, postu administrativu Manatuto Vila no suku Laku Mesak husi Postu Administrativu Lakló hahú ona prosesu eleisaun ho situasaun ne’ebé kontroladu.
”Prosesu eleisaun ba órgaun suku ba tinan 2025 iha munisípiu Manatuto oras ne’e la’o ho situasaun kontroladu no prosesu la’o normal,” Mariano informa ba TATOLI via telefónika, sábadu ne’e.
Nia haktuir, eleisaun ne’e iha sentru votasaun hitu.
Nia esplika husi suku Iliheu ne’e iha aldeia rua hanesan Ilihuli ho Ihun, entretantu suku Laku Mesak iha aldeia lima hanesan Hatu Conan, Labubu, Nacaleo, Readodoc, Tahagamu,” nia afirma.
Nia relata, kandidata husi suku rua ne’e iha suku ida ema na’in tolu. Iliheu iha ema na’in tolu no suku Laku Mesak iha ema na’in tolu.
”Totál votante ne’ebé mak iha suku Laku Mesak hamutuk 1.700 resin no suku Iliheu totál votante hamutuk 1.030,” nia subliña.
Nia esklarese, prosesu votasaun ohin iha Manatuto hahú iha dadeer tuku 09:00 Otl no ramata iha lorokraik tuku 15:00 Otl.
Estabelesementu suku foun sira iha Timor-Leste bazeia ba Lei Suku númeru: 19/2023 ne’ebé previstu iha artigu 91, iha-ne’ebé fó kompeténsia ba Ministériu Administrasaun Estatál (MAE) deside kriasaun suku foun referidu.
Manatuto nu’udár munisípiu ida husi Timor-Leste, lokalizadu iha parte leste kapitál Timor. Munisípiu ne’e halo fronteira ho munisípiu Baucau no Viqueque (leste), Tasi Timor (súl), munisípiu Dili, Aileu no Manufahi (oeste) no Tasi Estreito Wetar (norte). Munisípiu referidu iha postu administrativu neen hanesan Natarbora, Soibada, Laclubar, Manatuto, Laclo no Laleia ne’ebé inklui suku 31.
Demografikamente, Manatuto iha totál populasaun hamutuk 48,876 (tuir projesaun 2019) no densidade populasaun mak 27,36 ba área 1,785.95 km2. Grupu populasaun ida-ne’e ko’alia lian Tétun, Galole, Idate, Habun no Dadua.
Jornalista: Felicidade Ximenes
Editór: Xisto Freitas da Piedade
