BAUCAU, 25 janeiru 2025 (TATOLI)—Kandidatu Geraldo da Costa kompromete sei akumula komunidade husi aldeia haat hodi dezenvolve suku Caibada Makasae.
Geraldo da Costa esplika katak akumulasaun komunidade sai razaun prinsipál tanba durante tinan barak distánsia fó impaktu ba komunidade iha suku Caibada Makasae hanesan administrasaun no dezenvolvimentu báziku bainhira sei hamutuk ho suku Caibada Uaimua.
“Durante ne’e tanba distánsia entaun ami halo proposta ba Governu atu harii suku foun no konsege realiza duni. Nune’e, hau-nia vizaun hakarak akumula juventude hotu-hotu dezenvolve suku foun referidu,” kandidatu xefe suku Caibada Makasae informa ba TATOLI iha sentru votasaun, Caibada Makasae, Baucau, sábadu ne’e.
Geraldo hateten planu importante seluk ne’ebé sei halo mak serbisu hamutuk ho autoridade lokál postu administrativu no munisípiu liuliu halo atendimentu ba komunidade relasiona ho direitu idozu no invalidés hanesan subsídiu no seluk tan ne’ebé sempre atrazadu.
Aleinde ne’e, nia hatutan, halo mós atividade regulár liuhusi Programa Nasionál Dezenvolvimentu Suku (PNDS) nune’e bele kompleta liután infraestrutura bázika sira hanesan bee-moos no estrada ba komunidade.
Notísia relevante: http://STAE distribui materiál ba suku foun iha Baucau, aban realiza eleisaun
Gerlado da Costa promete katak kuandu eleitu sei halo tuir prosedimentu legál liuliu lei suku, kontrola komunidade, hakbesik atendimentu ba inan-aman sira, rezolve disputa rai iha baliza suku entre Buruma, Tirilolo no Buibau no mós akumula entidade hotu-hotu hodi dezenvolve suku.
Kandidatura ba suku foun Caibada Makasae hamutuk na’in-tolu kompostu husi Júlio Alegria, Maria Eugenia no Gerlado da Costa. Totál eleitór husi suku ne’e hamutuk 1.582.
Suku Caibada Makasae hamutuk aldeia haat kompostu husi Boru-baha, Caiobilale, Data-ua no Maulame ho tótal populasaun hamutuk 2.584 hosi uma-kain 584.
Elisaun suku foun iha munisípiu Baucau hamutuk suku tolu kompostu Builai, Ueru-Mata no Caibada Makasae ho tótal eleitór 3.500 resin.
Tuir lei suku númeru: 9/2009 hateten prosesu eleisaun ba líder suku sei loke sentru votasaun iha tuku 07:00 Otl hodi simu kandidatura xefe aldeia, delegadu no delegada maibé tanba líder aldeia antes ne’e eleitu ona nune’e prosesu eleisaun xefe suku sei hala’o iha tuku 09:00 Otl.
Estabelesementu suku foun sira iha Timor-Leste bazeia ba Lei Suku númeru: 19/2023 ne’ebé previstu iha artigu 91, fó kompeténsia ba Ministériu Administrasaun Estatál (MAE) deside kriasaun suku foun iha Timor laran.
Jornalista: Natalino Belo
Editór: Xisto Freitas da Piedade
