Ajente administrasaun na’in-38 simu pose husi AAM Baucau
BAUCAU, 27 janeiru 2025 (TATOLI)—Funsionáriu foun ajente administrativu na’in-38 simu pose husi Autoridade Administrasaun Munisipál (AAM) Baucau, segunda ne’e.
Prezidente Autoridade Munisipál (PAM) Baucau, Veneranda Lemos Martins, esplika funsionáriu hirak-ne’e rekruta liuhusi vaga no sei koloka ba departementu, diresaun no postu administrativu sira nune’e bele kompleta liután limitasaun rekursu umanu ne’ebé durante ne’e iha autoridade administrasaun munisipál.
Nia husu ba funsionáriu hirak-ne’e atu serbisu ho dedikasaun, kumpri regra, obedese ba superiór ierárkia no iha kompromisu atu serbí ho lealdade.
“Funsionáriu sira-ne’e ohin simu pose ona. Aban, sira hahú serbisu ona no husu atu hatudu dedikasaun ho responsabilidade,” Veneranda hateten iha Sentru Konvensaun Baucau (CCB-sigla portugés), Vila Antiga.
Eis deputada enkoraja funsionáriu hirak-ne’e atu labele kria grupuizmu inklui kór partidu iha serbisu fatin tanba nu’udár ajente serbí de’it Estadu liuliu kontribui ba dezenvolvimentu iha Baucau.
Entretantu, funsionáriu ajente hirak-ne’e hetan desizaun liuhusi Komisaun Funsaun Públika (CFP-sigla portugés) ho númeru: 6800/2025/CFP kona-ba pedidu omólogu rezultadu konkursu públiku no durasaun serbisu ba ajente hirak-ne’e durante tinan ida (hahú husi data simu pose to’o 31 dezembru 2025), ho kategória rua hanesan grau D no E.
Jornalista: Natalino Belo
Editór: Xisto Freitas da Piedade
